Nuup eqqaani nannuttoqaqqippoq
Sapaammi ulloqeqqalivissoq piniartoq Apollo Berthelsen Nuup eqqaani nannuppoq.
Apollo Berthelsenip pisani nanorsuaq tikiummagu Nuup talittarfiani ulapputtunnguaqarpoq.
Mobilikkut pilluaqqusisut imaaginnavipput. Inuppassuillu nannumik kiisalu piniartumik tulluusimaaqisumik takunnikkusutut ussagaqalutik. Nanoq aallaallugu toqukkamiuk umiatsiaaqqamini kisimippoq.
– Nanoq Qisuttuup Tunuata eqqaani (Nuup kitaatunginnguani, aaqq.) pisarivara, piniartoq Apollo Berthelsen nassuiaavoq.
Tassaana sunngiffimminni piniartut nanoq takusimagaat tamannalu VHF-radiukkut oqaatigisimallugu, nalunaarummillu tusaasut ilaat tassaavoq piniartoq Apollo Berthelsen Qeqertarsuatsiaarmiuusoq, sumiiffimmullumi tassa siullersaalluni tikiuppoq.
Nanoq imaani naluttoq aallaaneqarpoq.
– Assut nuannaarpunga. Nannunik toqungasuinnarnik takusarsimavunga tassalu aatsaat siullerpaamik nannumik uumasumik takuvunga, piniartoq 53-inik ukiulik Apollo Berthelsen oqarpoq.
Amia piniartup nammineq pigiinnarniarpaa natersuartullu atorneqartussaassaaq.