AK-p kommune eqqartuussivimmut tunniuppaa
Atorfillit Kattuffiat, AK, utaqqiisaagallartumik inissiami ineqarnermut akiliummik unioqqutitsilluni akiliisitsinermi tunngaviusumik aalajangeeqqusivoq.
Inunnik assigiinngisitsineruvoq Nuup Kommunerisimasaata atorfilik utaqqiisaagallartumik inissiami najugalik ineqarnermut akiliummut akiliisittarmagu, pissutigiinnarlugu taassuma Nuummi najugaqareernera, kommunimullu nuuttut utaqqiisaagallartumik inissiami akiliisinneqarneq ajortut.
Tamanna atorfillit kattuffiata AK-p isiginngitsuusaaginnarsinnaanngilaq taamanikkullu Nuup Kommunerisimasaa eqqartuussivimmut tunniullugu, piumasaqaatigalugu kommunimi atorfillit assigiissumik pineqassasut.
Suliassaq 2008-mi saqqummiunneqarpoq, taamanikkut AK-mut ilaasortaq saaffiginnimmat, pissutigalugu utaqqiisaagallartumik inissiamut akiliummik akiliisinneqarsimagami, sulisitsisumit allamit Nuup Kommunea sulisitsisorilerlugu atorfimminit nuukkami.
Ilaasortarlu kommunimut saaffiginnimmat tusarniarlugu aalajangerneq eqqortuunersoq, akineqarsimavoq:
- Sulisoq illoqarfimmit allameersoq Nuup Kommuneanilu atorfinittoq utaqqiisaagallartumik inissiamut inissinneqarnerminut akiliisinneqassanngilaq.
Tamanna Inatsisartut peqqussutaannik nr. 2, 12. maj 2005-imeersumik unioqqutitsineruvoq, tassani allassimammat utaqqiisaagallartumik inissinneqarnermi akiliisitsinissamut inatsisitigut tunngavissaqanngitsoq. Ilanngullugu AK-p tikkuarpaa peqqussummi tassani kaajallaasitaniluunniit allani sulisut assigiinngitsumik pineqarnissaannut inatsisitigut tunngavissaqanngitsoq.