Namminersornerulerneq pillugu inatsit ajunngitsoq nassaarineqarpoq
Allanneqaqqaarnera, dronning Margrethep 1979-imi Kalaallit Nunaannut tunniussaa, periarfeerunneqarluni tammaraluarpoq.
Namminersornerullutik Oqartussani annersaarullutik oqiliallarujussuarput.
Namminersornerulerneq pillugu inatsisip allanneqaqqaarfia dronning Margrethep 1. maaji 1979-imi Inatsisartuni utoqqaanersamut Lars Chemnitzimut inatsisartut Nuummi ataatsimiittarfiani tunniussaa, piffissami sivisuumi periarfeerunneqarluni tammarsimagaluarpoq.
Kisianni suna taamaat tikillugu naalakkersuisoqarfinni aamma toqqorsivinni ujaaserujussuareernerup kingorna allagaq oqaluttuarisaanermut pingaaruteqartoq Aningaasaqarnermut Nunanullu Allanut Naalakkersuisoqarfimmi ajunngitsoq nassaarineqarpoq.
Naalakkersuisoqarfimmi pisortaq Jan H. Lynge-Pedersen sermitsiaq.gl-imut oqarpoq namminersornerulerneq pillugu inatsit tammaraluartoq nassaareqqinneqartoq pilertortumik Naalakkersuisut Siulittaasuata Naalakkersuisoqarfianut tunniunneqarsimasoq.
Namminersornerullutik Oqartussani pisortaaneq Peter Schultz sermitsiaq.gl-imut oqarpoq inatsit, ullummikkut naalakkersuisut siulitaasuata aningaasivissuanut paarnaartartumut ernumananngitsumut ilineqarsimasoq, Inatsisartut siulittaasuannut tunniunneqarumaartoq.
Namminersulivinnerup juunip 21-ani eqqunneqarnissaanut atatillugu sermitsiaq.gl-imit ippassigami Naalakkersuisut Siulittaasuata Naalakkersuisoqarfianut sianerpugut inatsit oqaluttuarisaanermi pingaaruteqartoq assiliniarlugu, kisianni naalakkersuisoqarfimmi tigumminnginnamikku - Inatsiartut Allattoqarfianut innersuuppaatigut.
Inatsisartut allattaata Ellen Koldby Chemnitzip sermitsiaq.gl Aningaasaqarnermut Nunanullu Allanut Naalakkersuisoqarfimmut innersuuppaa, tassanilu naalakkersuisoqarfimmi pisortaq Jan H- Lynge-Pedersen neriorsuivoq inatsisip allanneqaqqaarfia ujartinniarlugu.
Piffissap ingerlanerani Nunatta Katersugaasiviani Toqqorsivianilu toqqortaatinik nakkutilliisoq Ole Christiansen tassaasinnavoq inatsisip allanneqaqqaarfianik kingullersaalluni takunnissimasoq.
– Aningaasaqarnermut Pisortaqarfiup Hotel Grønlandimit nutserneranut atatillugu ukioq ataaseq qaangiuttoq inatsit takuara, kisianni tunniussinermut allattugaatigut malillugi toqqorsivimmut tunniunneqarsimanngilaq, Ole Christiansen sermitsiaq.gl-imut oqarpoq.
Kisianni pignasunngormat ullaap tungaa Jan H. Lynge-Pedersenip ujallernersuaq unitsissinnaanngorpaa. Namminersornerulerneq pillugu inatsisip allanneqaqqaarfia 1979-imeersoq ajunngitsoq naalakkersuisoqarfiani ilisivimmi pappiaqqat qaleriissat akornanniittoq nassaarineqarsimavoq.
Lars Chemnitzip 1. maaji 1979 namminersorneq pillugu inatsit tigugamiuk Dronningimut neriorsuivoq imatut:
– Allanneqaqqaarfia uagut erlernartuutitut pigiuassavarput uangalu neriorsuutigissavara, taanna uagut paarilluarumaaripput!
Kiisalu inatsit siunissami paarilluarneqassaaq, namminersornerusut neriorsuipput, ungasinngitsukkut aamma namminersulivinneq pillugu inatsimmik paarisaqalertussaasut.