Nannut marluk pisarineqareerput
- Nuup eqqaanit nannut qaqutigoortuupput. Kisianni qaammatit marluk ingerlaneranni marluk takuneqarsimanerat immaqa qaqutigoortutut taaneqarsinnaanngikkaluarppoq, Pinngortitaleriffimmeersoq Erik Born oqarpoq.
- Nuummi qaammatit marluk ingerlaneranni nannut marluk takuneqarmata paasinerlullugulu uippallilerniaqitana.
Erik W. Born Pinngortitaleriffimeersoq Kalaallit Nunaanni nannut ingerlaartarnerannik immikkut ilisimasalik oqarpoq, aamma naak Nuup eqqaani qaammatit marluk ingerlanerinnaanni ukiumut nannuttassiissutit marluusut nungunneqareeraluartut eqqissisaavoq.
- Imaassinnaavoq nalaatsornerusoq, immaqalu sungiunniagassaasoq, Erik oqarpoq, aamma nangilluni oqaluttuarpoq assersuutigalugu Svaldbard-imi Canada-milu nanoq eqqaamiorisami takuneqarpat aallaat piaarnerpaamik aaneqarneq ajortoq. Nanoq uloriarnartuunersoq nalilerneqartarpoq, taamaassappallu aallaanissaa isummerfigineqassaaq. Taakkunani aamma ilisimaneqarpoq nannut navianartorsiortitsisuunngitsut, akerlianillu inunnik ersiginnittuunerusut.
- Nannut marluk Nuup eqqaanit pisarineqartut aataarsuarnik Akiata eqqaanit kitaata sikuanik taaneqartartumi amerliarttuinnartut takuneqartarsimasunik malinnaasimasinnaasut eqqoriarneqarsinnaavoq. Nunarsuup kissatsikkiartorneranik peqquteqartumik ukiuni kingullerni misinnartutut sikup annikillisimaneranik nannut ingerlaartarnerminni allannguisimasinnaapput aamma.
- Sikup sinaavani siku nutaajullunilu aalaakkaasuunngilaq, taamalu ilimagineqarsinnaavoq siku aserortilermat nannut ajornannginnersiorlutik nunap tungaanukarsimasut, Erik W. Born oqarpoq.
Nuup eqqaanit nanoq sapaatip akunnerata naaneranni pisarineqartoq ilanngullugu ukiumut pisassuussutit marluusut tamakkerneqarput. Ukioq mannamut pisassiissutit amerlineqarsinnaanerat pillugu Aalisarnermut Piniarnermullu Pisortaqarfik oqaaseqartinniaraluaratigut iluatsinngilaq.