Rio de Aalborgimi karneval
Ilaatigut kalaallit isiginnaartoralugit Europap Avannaani karnevalit annersaat nuannatsitsivoq takorannerineqarlunilu.
Oqariatuutigalugu "La dolce vita - Inuunerup nuannersua" Europap Avannaani karnevalit annersaata Aalborgimi ingerlanneqarnera ullumi arfininngornermi ataatsimut ingerlaaqatigiittoqarmat pikkunarsivoq. Peqataasut atisalersorsimasut Aalborgimi illoqarfiup immikkoortuini sumiiffinni assigiinngitsuniit aallartipput, ingerlaaqatigiillu ataatsimooriartoriarlutik katiteruupput Kildeparkenip tungaanut ataatsimut ingerlaaqatigiilerlutik. Tamaani sambamik nipilersorneq aamma nuannaaqatigiinneq ullup sinnera aammalumi unnuap ilarsua ingerlanneqassallutik.
Ingerlaaqatigiit takoranneqisut siuttui sungiusarsimasuupput avataniit aggersakkat, malittaalu ilumoorsaaruppallaarnagu ingerlaaqataapput, tamakkumi ukiut tamaasa pisartumut nuannaaqatigiinnermut peqataarusuttarput taamaalillutillu upernaap ullua nuannersumik atortarpaat.
Ilaqutariit Jens aamma Marine Magnussen Aasianneersut, maannakkut Aalborgimi najugallit meeqqatik Bo, Mia aamma Karina ilagalugit taamaalillutik Aalborgimi karnevali siullermeerlutik misigaat. Isumaqarput pissangarnartoq, kisianni alutorsaatiginerpaajuaat ingerlaaqatigiinni siuttuusut "inuussutissarsiutigalugu" peqataasartut.
Ingerlaaqatigiit maanimiunik aamma nunanit allaneersunit inuttaqartut Aalborgip qeqqa nalunaaquttat akunneri arlallit atorlugit ingerlaafigaat, tamaani nalinginnaasumik angallanneq unitsinneqarluinnarsimavoq isiginnaartullu titusindilikkaat siassimapput.
Karnevali Kildeparkenimi naassaaq, tamaani peqataasut amerlasuut qitillutik nipilersorlutillu unammissapput.