Kalaallit upperisarsiortut Sverigemi
Stockholmimi isumasioqatigiinnermi kalaallit upperisarsiortut alutorsartitsipput. Tamaani peqataasut Norgemeersut, Sverigemeersut aamma Danmarkimeersut kalaallisut guitarimik nipilersortunik qilaatersortunillu tusarnaarnissaminnut periarfissinneqarput.
Upperisarsiortut taaguuteqartut Inuunerup Nutaap Oqaluffia 1953-ip kingorna Kalaallit Nunaata kitaani illoqarfinni assigiinngitsuni ilagiinnik pilersitsisarsimapput.
- Ullumikkut 500-t missaannik ilaasortaqarpugut, kisianni neriuutigaarput ukiut qulit ingerlaneranni 5.000-inngornissarput, John Østergaard Nielsen Nuummi upperisarsiortuni palasiusoq oqarpoq. Aqqalu Berthelsen, upperisarsiortuni aqutsisut ilaat ingerlatsineq annertusiartortumik saqqummiussivoq, qanittukkullu Qaanaami pilersitsisoqarpoq.
Nutaarsiassaq aamma tassaavoq maannakkut Nuummi innuttaasut upperisarsiortut radioat Inuunerup Nipaa tusarnaarsinnaalermassuk.
Isumasioqatigiinneq pinsisiortut Sverigemi højskolianni Kaggeholmimi Stockholmip avataani ingerlanneqarpoq. Tamaani skandinaviami ajoqersuiartorsimasut 1953-imi upperisarsiortunik pilersitseqataasimasut naapipput, aamma 84-inik ukiulik Rune Åsblom siullersaalluni Kalaallit Nunaannut pisimasoq kiisalu aasat tamaasa suli Kalaallit Nunnaannut tikittartoq.
Upperisarsioqatigiit ilagiivi illoqarfinni ukunaniipput Nuuk, Maniitsoq, Sisimiut, Aasiaat, Qasigiannguit, Ilulissat, Uummannaq, Upernavik aamma Qaanaaq.