Sisimiuni angajoqqaat akerliusut
Tallimanngorpat angajoqqaat akerliussutsimik takutitsiniarput namminersornerusut illoqarfimmi atuarfiit marluk pillugit pilersaarutaannut akerliullutik.
Angajoqqaat atuarfinni marlunni, Minngortuunnguup Atuarfiani aamma Nalunnguarfiup Atuarfiani atuartuutillit ippassaq unnukkut ataatsimeeqatigiipput, namminersornerusut atuarfiit taakku marluk pillugit pilersaarutaannik tassa saqqummiussivigineqarlutik.
Qeqqata Kommunia marlunnik toqqagassaqartippaat:
1. Atuarfiit taakku pisoqaanersaat, Minngortuunnguup Atuarfia, siornatigut Skole 1-imik taaneqartartoq, piiarneqassaaq, tassani atuartut atuarfimmut allamut nuutsinneqassallutik, taanna blokimik ataatsimik allilerneqassalluni. Taamatut nuutsitsinerup kingunerissavaa atuaqatigiinni tamani atuartut 26-nut amerlinissaat.
2. Minngortunnguup Atuarfiani atuartut affaat Nalunnguarfiup Atuarfianut nuutsinneqassapput. Minngortunnguup Atuarfiani atuartoqarneq allanngortinneqassaaq ukioqatigiillutik atuaqatigiiaat klassimi ataasiinnarmi atuaqatigiissinneqalissapput.
Angajoqqaat tamanna akueriumanngilaat. Kissaatigaat atuarfiit taakku marluk massakkutut ingerlaannarnissaat, aamma Minngortunnguup Atuarfiata pisoqaanertaa 1968-ip siornaneersoq tamakkivillugu iluarsartuunneqassasoq, taamatut oqaluttuarpoq atuarfimmi siulersuisut siulittaasuat, Jørgen Peter Labansen.
Akerliunertik takutikkumallugu tallimanngornermi maajip 29-ani nal. 14.00 Nalunnguarfiup Atuarfianit Minngortunnguup Atuarfianut tassanngaanniillu Qeqqata Kommuniata allaffiata tungaanut angajoqqaat akerliussutsimik takutitsillutik ingerlaaqatigiinniarput.
Angajoqqaat aaqqissuussinerup pilersaarusiornerani peqataarusuttut pingasunngornermi nal. 16.15 Minngortunnguup Atuarfiani ilinniartitsisut inaannut ataatsimiigiarsinnaapput, Jørgen Peter Labansenip ilisimatitsissutigaa.