Kunngikkormiut Qeqertarsuarmi

Nunani avannarlerni kunngissat pingasut kunngissaq Frederik, Norgemi kunngissaq Haakon aamma Sverigemi kunngissaq Victoria sisamanngornermi ullup qeqqata siornatigut Qeqertarsuarmut silageqisumi apuupput.

Qaasuitsup Kommuniani borgmesterip tullia siulleq Timooq Mølgaard, Qeqertarsuaq, immikkoortortaqarfimmi pisortaq Benedikte Mølgaard peqatigalugu kunngikkormiunik tikilluaqqusipput, taakku alapernaarsuummut »Ejnar Mikkelsen«-imut ilaallutik tikimmata.

Erinarsoqatigiit Nikanaq katersugaasiviup silataani erinarsorput, tassani aamma innuttaasunut kaffisortitsisoqarluni.

– Kunngissap oqaluttuaraa maanna Kalaallit Nunaata paradisianut tikilluni, Qeqertarsuaq pinnersunik avatangiiseqarmat, Saalamiit Møller Lorentzen, aamma assiliisuusoq, oqaluttuarpoq.

– Aamma apeqqutigaa Qeqertarsuup Sermersuani suli qimussertoqarsinnaanersoq. Qimusserusussuaaraluarami, Saalamiit Møller Lorentzen oqaluttuarpoq.

2004-mi nulii Mary angajoqqaanilu peqatigalugit Nunatsinniinnermi kunngissaq Frederik Qeqertarsuup Sermersuani qimusserpoq.

Sisamanngornermi Arktisk Station Københavnip Universitetiata immikkoortortaqarfia kunngissakkut takornariarpaat. Tassani ilisimatusaatigineqarput Issittumi botanik, geografi aamma zoologi. Ilisimatusarfik taanna 1906-imi pilersinneqarpoq.

Aamma Qeqertarsuarmi pinngortitami immikkuullarissumi, qangarsuaq innermik anitsisartuunera erseqqilluinnartuusumi, pisuttuarnissamut piffissaqarput. Innermik anitsisartoqarfiusimasoq Kuanniniittoq kunngissakkut takusarpaat.

Sisamanngornermi unnukkut Qeqertarsuarmiit kunngissakkut aallassapput, silap pissusiata allanngoriartornera ilisimatusarnerlu pillugit angalanermi oqalugiartoqassalluni.

Tallimanngornermi kunngissakkut Ilulissanut pissapput.