Kissaviarsuk ajutoorsimasoq annaanneqartoq
Kissaviarsuk nukillaarsimaqaluni timmisinnaananilu nassaarineqartoq Nuummi ukiuunera anigorpaa.
Kissaviarsuk arlaannisaq suli maannamut Nuup kujataatungaani takussaavoq, tamaani akutunngitsumik altanip ungaluusaaniit avammut piniarfigisartakkani iginnaaruusaartarpai. Timmiarlu kissaviarsumit allamit ingiallorteqalersimavoq taannalu aamma arnaviaagunarpoq taakkulu ataatsimoortut akutunngitsumik takuneqartarput. Timmissap assiinik takuneqarsinnaavoq timmiaq pineqartoq taanaasoq, tassami biologip Lars Maltha Rasmussenip, Pinngortitaleriffimmeersup assammiumik nalunaaqutsersimavaa, natur.gl allappoq.
Novembari 2008-mi qiteqqukkaa Rene Olsenip, Nuummi qimminik tigooraasartup, kissaviarsuk Uumasunut unnuititsisarfimmut eqquppaa. Timmiaq antennimi mitsimasoq takuneqarsimavoq tulukkanik uumisaarneqartoq. Rene Olsenillu Qernertunnguit eqqaanni nassaarigamiuk Nuummik Uumasunut unnuititsisarfimmukaassimavaa, tamaani kinaaleraaq Susanne Agnholt Markdalimit tiguneqarpoq. Uumasut nakorsaata misissoramiuk paasivaa isikkamigut ajoqusersimasoq, kisianni annertunngitsumik. Kissaviarsuk nerlersorneqartariarami iluarsiartupallappoq nukittormallu tingitinneqaqqippoq decembarip 14-iani. Soorlu oqaatigineqareersutut taamaalisoqartinnagu nalunaaqutserneqaqqaarpoq, kiisalu suluisa sanimut takissusiisa uuttorneqarneratigut paasineqarpoq arnaviaasoq. Arnavissat angutivianit 25 aamma 35 %-it missaannik oqimaannerupput suluilu sanimut takinerullutik.
Isumaqarnarpoq kissaviarsuk sumiiffimmi, illoqarfiup kujataata tungaani tingitinneqarfimmi eqqaani uninngaannarsimasoq. Akuttunngitsumik takuneqartarpoq timmissat nujuartat qaasuttut ajoqusernerit annikitsunnguilluunniit Kalaallit Nunaanni pinngortitami sakkortusinnaasumi assut kingunerlutsittaraat. Taamaattumik assut nuannerpoq timmiaq taanna nujuartaq qaasuttoq aniguilluarsimasoq paasillugu.
Naak kissaviarsuk Kalaallit Nunaanni siammarsimagaluaqaluni, sumiiffinni tamani ikittuinnaapput, naatsorsuutigineqarpoq Kalaallit Nunaanni erniortartut aappariit 225-t aamma 500-t akornanniissasut.
Kissaviarsuik siusinnerpaamik aatsaat marlunnik ukioqaleraangamik mannilisarput, kiisalu naatsorsuutigisariaqarpoq kissaviarsuit Nuup eqqaani takussaasut arlaannisaasut, taakkulu nutaanik periarfissaminnik ujaasinissaat ilimanarluinnarpoq aappaagu manniliffissaminnik nassaarsiuutigalutik allamut nuukkumaartut. Kissaviarsuit utoqqaanerit Kalaallit Nunaanni kujasinnerusumi manilisartut maannakku apriilip qiteqqunnerani mannilereersimasinnaapput.
Kissaviarsuit piniaqqusaanngilluinnarput aamma uumasuutigeqqusaanngillat.