IMAK-imi siulittaasutut qinigaaqqippoq
Sivso Dorph linniartitsisut kattuffianni IMAK-imi ukiuni sisamani suli siulittaasuusussatut qinigaaqqippoq.
Qinersineq pivoq IMAK-ip ataatsimeersuarnerani, taanna Ilulissani apriilip ulluisa 19-ianniit 21-iata tungaanut ingerlanneqarpoq.
- Qinigaanerani tamatumalu tatiginninnermik takutitsinera assorsuaq nuannaarutigaara, siulittaasoq qinigaaqqittoq oqarpoq.
Sivso Dorph siullerpaamik IMAK-imi siulittaasutut 2001-imi qinigaavoq taamaalilluini siulittaasutut qinigaaffiit sisamassaat aallarnerlugu.
Ataatsimeersuartut siulittaasunngoqqittoq iperaattamik Siorapalummi sananeqarsimasumik tunissuteqarfigaat.
- Uanga assorsuaq sanaaq una taamak kusanartigisoq nuannaarutigaara, kiisalu ilissi ilisimassavarsi taanna eqqarsarluarlunga atortassagakkut, Sivso Dorph oqarpoq.
IMAK-imi siulittaasutut qinigaaqqittoq 54-inik ukiulik Qaanaami inunngorsimavoq, ilaatigut Savissivimmi Ilulissanilu peroriartorluni. Ilinniartitsisutut ilinniagaqartuuvoq atuarfinnilu Nuummi aamma Ilulissani ilinniartitsisutut atuarfimmi pisortatut atorfeqartarsimalluni.
IMAK-ip siulersuisuinut 1998-imi qinigaavoq, 2000-imi kattuffimmi allaffeqarfiup pisortaatut atorfinilluni kiisalu 2001-imi siullerpaamik IMAK-imi, 1200 missaannik ilaasortaqartumi, siulittaasutut qinigaalluni.
- Siunissami annertoorujussuarnik suliassaqarpugut. Maani ataatsimeersuarnermi piffissaq pingaarutilinnut amerlasuunut atorsimavarput, kisianni maannakkorpiaq suliassagut tassaapput isumaqatigiinniarnerit utaqqiinnartut ingerlanneqarnissaat, Sivso Dorph oqarpoq, ilaasortat, siulersuisut aamma kattuffimmi sulisut peqatigalugit suliami ingerlateqqinnissaa qilanaaralugu.