Take-away--ini igaffiit matuneqarput
Nerisassanik nakkutilliisoqarfiup nalunaaqqaarani misissuiartornerata kingorna Videobutik-imi sawadii-milu nerisassat matuneqarput.
Nuummi videobutikken imaluunniit Sawadii nerisassanik tuniniaasinnaanermut akuersissummik peqanngillat, aammalu eqqiluisaarnermut piumasaqaatit eqqortissimanagit. Taamaattumik nerisassiorfiit take-away-t taakku marluk matuneqarput, AG allappoq.
Videobutikkenip thailandimiut nerisassiaannik nioqquteqarluni ingerlalluarsimavoq, taamalu Videobutikkip ukiuni marlunni nerisassanik tuniniaasarsimanerani ullup-qeqqata nalaani inoqarluartarsimavoq. Kisianni uumasut nakorsaata inerisaasanik nakkutilliisuneersup nalilerpaa pisiniartarfiup piumasaqaatit eqqortinngikkai.
Videobutikkenip piginnittua Leif Pedersen, aamma »Video-Leif«-imik ilisimaneqartup, uumasut nakorsaata naliliinera tusaatissatut tiguaa, kisiannili peqatigitillugu AG-mut oqaatigaa, aasamut igaffimmik nutaamik piareersiumaarluni.
Sawadii nerisassanik nioqquteqarsinnaajunnartinnani sapaatit akunnerini marluinnarni ammasimavoq.