DIH-mi atorfinerlaat

Siuariarneq annikitsuarannguaq Dronning INgridip Napparsimaviani pisortap mianersortunnguamik peqqissaatut sisamat atorfineqqammersut taamatut oqaatigai.

Assiliisoq: Leiff Josefsen

Napparsimavissuarmi napparsimasunut tamatuma kingunerissavaa uninngaviit qulit matoqqasimasut ammarneqarnerat, kiisalu utaqqisuutigineqartut ikittunnguit ammaanneqarnerat, knr.gl allappoq.

- Pilattaasarfimmi sisamat aalajangersimasumik atorfinitsippavut kiisalu nakorsaatitortunut immikkoortortaqarfimmi aamma arlaqanngitsut isumaqatigiissutit tunngavigalugit atorfinitsinnissaat ilimanarpoq. Tamatuma kingunerissavaa uninngavinnik matoqqasunik arlaqanngitsunik ammaasinnaanerput, SANA-mi allaffeqarfimmi pisortaq Ann Birkekær Kjeldsen oqarpoq.

Siuariarnermut ilaatigut pissutaasutut nassuiaatigaa upernarnerani napparsimaveqarfimmut piumasoqarnerusarnera, kisianni taannaannaq tunuliaqutaanngitsoq.

- Kalaallit Nunaanni peqqissaasutut sulilluni assorsuaq pissanganarpoq. Aammattaaq artornaqaaq unammilligassarpassuaqarpoq annertuumillu akisussaaffeqarfiulluni. Arlalillu aamma nammineersinnaanerulerfissatut isigisarpaat. Tamatuma saniatigut uanga isumaqarpunga nunani allani peqqissaasussarsiorluta takutitsiniarnerput aamma iluaqutaasimasoq, oqarpoq.

Ann Birkekær Kjeldsenip oqaasii naapertorlugit nakorsaatitortunut immikkoortortaqarfimmi uninngaffiit arfinillit ammarneqassapput kiisalu K3-mi, iluisiuinermut immikkoortortaqarfiusumi uninngasarfiit sisimat ammaqqinneqassapput. Napparsimasut utaqqisutut allatsissimasuniit ilumikkut ajornartorsiuteqartut aamma sungamikkut ujarattallit suliarineqarsimapput. Taakku saniatigut aamma seeqquluttut kiisalu siviamikkut suliarineqartussat amerlanngitsut suliarineqarput naallu tamakkut aallarniutaasut annikitsunnguugaluartut, taamaattoq Ann Birkekær Kjeldsenip siuariarneq tamanna annikikkaluartoq assut iluarisimaarpaa.

- Taakku amerlanngillat kisianni imaappoq uagut oqarsinnaalerpugut utaqqisunut allattorsimaffimmi allattugaatigut annikitsunnguamik ikiliartortilerpavut, Ann Birkekær Kjeldsen oqarpoq.

Maajip aallaqqaataa aallarnerfigalugu pilattaanermut immikkoortortaqarfimmi peqqissaasut sisamat atorfinitsinneqarput kiisalu nakorsaatitortunut immikkoortortaqarfimmi peqqissaasut taartaagallartut sisamat isumaqatigiissutit tunngavigalugit atorfinitsinneqarlutik, tamatuma kingunerissavaa suliniutinut aamma ulluinnarlugu pilattaasarneq annikikkaluamik ingerlanneqaqqissinnaalissasoq.

Powered by Labrador CMS