Meeqqat inuunerat oqaatsini titartakkanilu

Kangaatsiami Kullorsuarmilu 6. klassimi atuartut peqatigiiffiup Meeqqat Inuunerissut/Bedre Børnelivip unammisitsinerani meeqqat qanoq inuunerissuunerannut titartaanermi oqaasertaliinermilu ajugaapput.

Titartakkat ajugaasut ilaat. Assi: MIBB

Taakkunani atuarfinni marlunni atuartut unammisitsitinermi peqataapput titartakkanik kusanarluinnartunik taallanillu nuannersunik nassiussillutik. Taamaallillutik oqaasertalimmik qalipaatilimmillu oqariartuuteqarput meeqqat qanoq inuunerissuussanersut.

Unammisitsitinermi ilinniartut nuna tamakkerlugu peqataapput, peqataasullu nassiussaannut qamannga pisumik qujavugut. Klassit ilaat plakat-iliorsimapput allallu aviiseeraliorsimallutik. Nassiussarsiatsinni tamani erserpoq meeqqat piffissaqarfigilluarlugu isumatik takutikkusussimagaat suut pisariaqartuunersut inuunerissuunermi.

Asaneqarneq qaalu imerunnaarlusilu pujortarunnaaritsi!

Meeqqat amerlanersaat, oqaluttuarivaat meeqqap inuunerissuunissaanut pingaartuusoq asanninnermik ilaqutariinniit ikinngutiniillu tunineqarnissaq. Angajoqqaat meeqqatik asanerarlugit oqarfigisariaqarpaat, sukisaaqatigiinnermik nuannersunillu sammisaqaqatigalugit. Meeqqallu ilaasa, inersimasut imerunnaaqqullugillu pujortarunnaaqquaat..

Ikinnguteqarluarneq timersornerlu meeqqap inuunerissuunissaanut pingaaruteqartuupput

Meeqqat amerlasuut oqaluttuarput ikinngutigissaarneq meeqqap inuunerissuunissaanut pingaaruteqartoq. Meeqqat timersornissamik ikinngutillu pinnguaqatiginissaanik periarfissaqartariaqarput. Meeqqat illoqarfinni minnerusuneersut nunaqarfinneersullu ornittagaqarnissaminnik nuannisariarfissaminnillu ujartuipput. Naluttarfiit titartaganngortitat meeqqallu ineeqqaminik pilerigisaminik titartaanerisa takutippaat meeqqap avatangiisiminik nuannarisinnaasaminik kissaateqarnera.

Meeqqat isumaat postkortinngorlugit tamanut ersersinneqassapput

Meeqqat isummartik annissinnaasariaqarpaat tusarneqartariaqarlutillu. Taamaammat Meeqqat Inuunerissut/Bedre børneliv allagartannguanik sanatitsivoq, unammisitsitinermiit nassiussarsiatsinnit. Taamaalilluta inuit amerlanerusut tusassavaat meeqqat qanoq oqariartuuteqartut suut pisariaqarnersut meeraq inuunerinnerulertinnissaanut. Saniatigut meeqqat ilanngussaat isumassarsiassatut quppersaganngorlugit sananiarpugut, meeqqanik sullitalinnut allallu soqutiginnitut atorluarsinnaasaanik isumassarsiornitsinni qanoq meeraq inuunerinnerulertinnissaanik ujartuinitsinni.

Tunuliaqutaa

Peqatigiiffiup Meeqqat Inuunerissut/Bedre Børnelivip suliniutigaa Kalaallit Nunaani meeqqat atugarititaasa pitsanngorniarnissaat. Tassanngaannartumik iluarsiinata siunissaq ungasittoq isigalugu iliuusissanik suliassanillu piareersaasiorneq anguniarparput. Tassanngaannartunik iluarsiiniarneq ajoraluartumik atorneqakkajuppoq tulleriissaarineq siunissarlu ungasissoq isigineqarneq ajormat. Peqatigiiffik pilersinneqarpoq januaarip 23-ni 2008.

Powered by Labrador CMS