Angalatitseqatigiiffik politiinut tunniunneqartoq
Angalatitseqatigiiffik Nerthus-Explore sallulluni oqarpoq Kalaallit Nunaannut angalatitsisarnini Rejsegarantifondenimit (Angalanermi Sillimmasiisarfimmit) sillimmaserneqartartut.
Selskabi quppernermini nittartakkami allappoq ukiuni kingullerni arfineq-marlunni Kalaallit Nunaannut kisissaanngitsunik angalatitseqattaartartorujssuusimalluni, Nerthus-Explore-milu ilisimasortat tassaasut qimussimik alapernaarsuisuni Siriusimi ilaasortaasimasut assigisaalluunniit, taamatut allappoq politiken.dk.
Tassami angalatitseqatigiiffiup, Jesper Melin Ganc-Petersenimit, imminut SIRIUS 99-01-imi iliisimasassarsiortut nakorsaattut taasumit, pigineqartup angalanerit neqeroorutigai Rejsegarantifondenimit sillimmaserneqarsimasutut.
Nerthus-Explore ApS-ili 2008-mi aggustip 28-ianni Rejsegarantifondenimit ilaasortaajunnaarsinneqarallarpoq, selskabilu angalanernik sillimmasiisarfimmit tassannga sillimmaserneqartunik neqerooruteqaqqusaanngilaq.
2008-ni decembarimili Rejsegarantifondenip Nerthus-Explore ApS pissutsit tamakkua pissutigalugit politiinut tunniussimavaa. Tamatuma kingorna selskabip quppernerni nittartakani matuvaa, maannali qupperneq nittartagaq ammaqqissimallugu.
Nerthus-Explore-p ulluni makkunani ingerlappaa sermersuaq itivillugu issittumi ilisimasassarsiornertut taaneqartoq. Angalaneq 580 kilometerinik isortartutigisoq Kangerlussuarmit aprilip 16-iannit aallartinneqarpoq naatsorsuutigineqarlunilu majip 20-iannut sivisussuseqassasoq.