Sermitsiaq JOB iluatsilluareerpoq
Sermitsiaq.gl-imi suliffissarsiortarfik qaammat ataasiinnaq internetimeeriiginnarluni iluatsilluassagunarpoq.
Suliffissarsiortarfik Sermitsiaq JOB qaammatip ataatsip matuma siorna saqqummersinneqaqqaarmali netaviisip sermitsiaq.gl-ip nittartagaa pingaaneq 4.783-eriarluni iserfigineqartarsimavoq.
– Ajunngeqaat, taamalu Sermitsiaq JOB sermitsiaq.gl-imi ullut kingulliit 30-it ingerlaneranni quppernerit ataasiakkaat alakkarneqartartut normu 10-attut inissilluni, nittarsaassinermut pisortaq Nicholai Jakobsen ilisimatitsivoq.
– Maanna suliffissarsiortarfimmik peqalerpugut online-imik iluamik atorluarneqartumik. Aamma ataatsimut isigalugu nunatsinni suliffissarsiortarfiit pilerinarnersaannik peqalerpugut, tassa kisiartaalluta sulisussarsiorlutik anonce-t aviisitigut naqitatigut Sermitsiakkut Nuuk Ugeaviisikkullu online-imik takutissinnaagatsigit. Unammillertitsinni anonnce-liunniagaq aviisimi ataasiinnarmi imaluunniit nettimi takutinneqartarpoq, Nicholaj Jakobsen erseqqissaavoq.