18-inik ukiulik katsorsagassatut pineqaatissinneqarpoq
Angut inuusuttoq Aasianneersoq unnerluussissutini katillugit 25-ni pineqaatissinneqarluni katsorsaasarfimmiittussanngortinneqarpoq.
Angut inuusuttoq eqqasartaatimigut ajuutilik ilaatigut pineqaatissinneqarpoq nakuusersimasutut, pinngitsaaliilluni atoqateqariarsimasutut, pisattanik aserorterisimasutut unnerluussissutillu amerlanersaanni tilliniartarsimasutut.
- Angut inussuttoq taanna ukioq kingulleq novembarip 8-nni tigusarineqarpoq, suliarineqarneralu sapaatip akkunnerani uani eqqartuussivimmi suliarineqalertinnagu eqqarsartaatsikkut misissuinerit arlallit ingerlanneqaqqaarsimallutik. Pineqaatissiissut akueraa, aallartinnanilu - immaqa Danmarkimut - Aasianniikkallassalluni. Danmarkimi nappaatiminut katsorsarneqarsinnaassaaq, Aasianni politeeqarfimmi pisortaagallartoq Aqqaluk Petersen oqarpoq.
Eqqartuussissummi aamma allassimavoq, angut nakorsaq akuersissuteqaqqaartinnagu iperagaasinnaanngitsoq, aammalu iperagaatinneqassagaluarpat nakorsamiit pinerluuteqarsimasumillu nakkutilliisoqarfimmiit angutip katsorsarneqarnissaata ingerlaannarnissaanut piumasaqaammik pissarsisoqaqqaartariaqartoq, tamatumani ikiaroornartunik assigisaannilluunniit atueqqusaanngilaq.