Meeqqat pilliutaat annertoqaaq
Kisianni Kalaallit Nunaat aningaasat sakkugalugit pillarniarlugu siorasaarineq meeqqanut tunngatillugu iliuuseqartoqannginnera neqitsiullugu tapiilliorneruvoq piviusunik tunngaveqanngitsoq, Lars-Emil Johansen, Siumut, oqarpoq ullumi Folketingimi oqallinnermi.
- Isumaginninnermi sullissineq namminersornerunerup ukiut 30-t matuma siorna eqqunneqarmalli annertusiartuinnarsimavoq, ullumikkullu Namminersornerullutik Oqartussat missingersuutaasa 25 procenteralugu. Tassami ullumikkut isumaginninnermut attuumassuteqartut assigiinngitsut kalaallit kommuniisa katillugit missingersuutaasa 45 procenteraat, oqallinnermi oqaaseqarnermini Lars-Emil Johansen erseqqissaavoq.
Taamaattorli nassuerutigaa tamanna naammanngitsoq.
- Namminersornerusut, kommunit aamma namminersortut qanorluunniit annertutigisumik iliuuseqaraluartut Kalaallit Nunaanni suli ajornartorsiuteqartoqarpoq, tamannalu suli meeqqanut amerlavallaartunut pilliuteqarfiuvoq.
Lars-Emil Johansenimi naalagaaffik aamma namminersornerusut kaammattorpai annertuumik iliuuseqaqqullugit soorlu 1950-ikkunni sakialluut akiorniarlugu iliortoqartoq.
- Regeringi aamma naalakkersuit ataatsimoorlutik sakkortuumik oqaluttuarisaanermi takuneqarsimanngitsumik imigassaq aamma ikiaroornartoq (hash) akiorniarlugu iliuuseqarniarunik - soorlu 50-ikkunni tuberkulose akiorniarlugu annertuumik iliuuseqartoqartoq, - kiisalu regeringi aamma naalakkersuisut - aamma ajunngilaq UNICEF suleqatigalugu kiisalu kalaallit ikiuiniartut, meeqqat illuinik pilersitsiniarunik, taakkunani meeqqat toqqissisimaffigisinnaasaanni periarfissaqarlutillu nerinissaminnut aamma unnuinissaminnut, aap taava naalagaaffeqatigiinnermi aammaarluni takutinneqassagaluarpoq nukittoqatigiinneq, Lars-Emil Johansen oqarpoq.
Aamma erseqqissaatigaa Kalaallit Nunaat nunat ikittunnguit assigalugit meeqqat pisinnaatitaaffiat pillugit isumaqatigiissummik inatsisinngortitsisimasoq.
- Kalaallit Nunaat aamma tassaavoq nuna meeqqat atuarfianni meeqqat pisinnaatitaaffiat pillugit isumaqatigiissummik atuartitsinermi ilaatitsisoq.
Oqalugiaat tamakkerlugu (qallunaatut) talerpiup tungaanit atuaruk...