Imigassamik eqqussuinikinneruvugut
2007-imut sanilliullugu 2008-mi imigassamik 11 procentimik annikinnerusumik eqqussuisimavugut, Kalaallit Nunaanni Naatsorsueqqissaartarfik paasissutissiivoq.
Kisitsisini takussutissani eqqussinermik pineqarput imigassat KNI-mit eqqunneqartut pisiniarfinnilu tuniniarneqartut.
Imigassat tamarmiusut 2008-mi nunamut eqqunneqartut 452.000 liiterit missaanniipput. Ukiumut siulianut sanilliullugu 59.000 liiterit missaannik, imaluunniit 11,6 procentimik, eqqussinikinneruvugut.
Eqqussuineq isumaqarpoq inuk ataaseq 14-it sinnerlugit ukiulik imigassamik 10,55 liiterimik eqqussisimasoq, siornamullu sanilliullugu 11,9 procentimik annikinneruvoq, taamani inuk ataaseq 14-it sinnerlugit ukiulik 11,97 liiterimik eqqussisimammat.
Pingaartumik imigassat sakkortuut eqqunneqartut ikileriarsimapput, tassa 2008-mi imigassaq taamaattoq 38.000 liiteri eqqunneqarsimammat, 2007-imi 63.000 liiteri eqqunneqarsimalluni. Tassa 40 procentimik annikilleriarluni.
Aamma viinninik eqqussineq annikilleriarpoq. 2008-mi 83.000 liiteri eqqunneqarsimavoq, ukiup siuliani 111.000 liiteri eqqunneqarsimasoq. TAssa 25 procentit missaannik ikileriarluni.
Immiaaqqat 2008-mi eqqunneqartut 331.000 liiteriusmapput, 2007-imi 338.000 liiteriusimallutik. Tassa 2 procentinik annikilleriarlutik.
Kisitsisit takuneqarsinnaapput "Kalaallit Nunaannut imigassamik eqqussuineq 2004-2008"-mi, Kalaallit Nunaanni Naatsorsueqqissaartarfiup tamamut saqqummiuteqqammisaani.