Silap pissusaa pillugu ICC-mi ataatsimeersuarneq
ICC-p Kalaallit Nunaanni præsidentiata Aqqaluk Lyngep oqalugiaqattaarnerit ammarlugit silap pissusaata allanngoriartornerata Inuit nunaannut kinguneriumaagai pillugit nalunaarusiaq saqqummiuppaa.
ICC-p siulittaasuata Patricia Cochranip silap pissusaata allanngoriartornera pillugu ataatsimeersuartitsinermi aaqqissuisuusut nunap inoqqaavi sinnerlugit ataasinngornermi aprillip 20-anni ataatsimeersuarneq ammarpaa, Alaskami Anchoragemi. Ataatsimeersuarnermi sapaatip akunnerani uani ingerlasussami nunap inoqqaavisa sinnissaat nunanit tamalaanit 500-t missaanniittut peqataapput.
Ataatsimeersuarneq FN-ip sila pillugu Københavnimi decembarimi ataatsimeersuartitsinissaanut piareersaatinut ilaavoq, tassani ataatsimoortumik oqaaseqaatissap suliarineqarnissaa siunertarineqarluni. ICC-ip Kalaallit Nunaanni præsidentiata oqalugiaqattaarnerit ammarlugit silap pissusaata allanngoriartornerata nunanut Inuit najugaannut tamanut sunniutigisinnaasai pillugit nalunarusiaq saqqummiuppaa.
ICC-Kalaallit Nunaaniit aamma Carl Chr. Olsen Lene Kielsen Holmilu peqataapput, Inuuteq Holm Olsen, Namminersornerullutik Oqartussat sinnerlugit peqataalluni.