Nuummi meeraaraatilinnut filmertarfik
Katuaq Bio Sisimiunit Taseralik Bio-mit isumassarsitiinneqarluni angajoqqaanut meeraaraatilinnut filmerfissamik periarfissiivoq.
Annonse
Angajoqqaanngorlaat sivisuumik filmeriarsimanngitsut maanna naalungiarsuutitik ilagalugit filmersinnaalerput, Katuap paasissutissiisartua Conny Rasmussen ilisimatitsivoq.
Meeraaqqat eqqarsaatigalugit filmip nipaat sakkukillineqartassaaq, qulliillu qaammartisimalaarlugit, barnevognillu filmertarfimmut eqqunneqarsinnaallutik.
Babybio-mut billetip nalinginnaasumik filmilernermut akit assigai, meeraaqqat akeqanngitsumik filmeqataasinnaallutik.
Allat aamma tikilluaqqusaapput, kisianni Katuaq Bio-p malugeqquaa taamatut aaqqissuussineq angajoqqaanngorlaanut immikkut aaqqissuussaammat.
Babybio qaammammut ataasiartumik neqeroorutigineqartassaaq, filmertitsineq siulleq maajip 22-anni nal. 13.00 pissaaq, isiginnaagassaq tassaalluni Nat på museet 2.