Arfiviit pisataat anniseqqusaanngillat
Arfivimmit tunisassiat Kalaallit Nunaannit anniseqqusaanngillat.
Avatangiisinut Pinngortitamullu Nakkutilliisoqarfimmiit maluginiaqquneqarpoq arfivik Washingtonimi Isumaqatigiissut/CITES naapertorlugu Allattorsimaffik I-imiimmat. Imaappoq arfivinnik tunisassiat takornarissanut, tunissutitut imaluunniit iluanaarniutitut avammut anniseqqusaanngitsoq.
Taamaattorli avammut annissinissamut akuersissummik Kalaallit Nunaanni Avatangiisinut Pinngortitamullu Nakkutilliisoqarfimmut piniareernikkut aammalu nunamut tikitamut akuersissummik pereernikkut pigisat nuunnerinut atatillug arfivimmik tunisassiat ilanngunneqarsinnaapput.
Arfanniarnermut ataatsimiitsitaliarsuaq IWC aqqutigalugu arfivittassaqarpoq. IWC-ip siorna ataatsimiinnerani isumaqatigiissutigineqarpoq, Kalaallit Nunaat 2008-miit 2012 tikillugu arfivinnik ukiumut marloraarsinnaatitaasoq, pisarinngitsuukkat marluuppata ukiumut tullissaanut nuunneqarsinnaanerannut periarfissaqarluni. Taamaalilluni Kalaallit Nunaanni 2009-mi arfiviit sisamat pisarisinnaavaat.
Akerlianik aarrit avammut anninneqarsinnaatitaapput, taakku Washingtonimi Isumaqatigiissut/CITES naapertorlugu Allattorsimaffik III-miipput.
Aaffattassiissutit Kalaallit Nunaanni pinngortitaleriffimmiit 2006-mi biologit siunnersuinerannut naapertuuttumik ikilisinneqarsimapput, pisassiissutinilu ”struck-and-lost” - tassa pissatat annaasat - ilanngunneqarsimapput.
Ukioq manna nutaamik kisitsisoqassaaq, taamaaliortoqareerpallu biologit innersuussutissaat 2009-mi ukiakkut piariissaaq. 2010-mut pisassiissutissatut siunnersuutit naammassisimalerpata Pinngortitaleriffiup CITES-imut tunngatillugu Kalaallit Nunaanni Ilisimatuussutsikkut siunnersuisoqatigiiffittut inissisimanini atorlugu aarrit nungusaataanngitsumik piniarneqarsinnaanerannik uppernarsaat nutaaq suliarissavaa.
Pisassiissutit biologit innersuussutaannit amerlanerusut tunniunneqassappata tamanna aarrit avammut anniseqqusaajunnaarnerannik kinguneqarsinnaavoq.