Nakorsaaneq: Puulukip nualluutaa Ilulissani eqqueqqaassaaq
Ilulissat Kalaallit Nunaanni sinerissami illoqarfinnut allanut sanilliullugu takornariarfissatut ornigarneqarnerpaajugami puulukip nualluutaanit eqqorneqarnissamut qaninnerpaajuvoq, nunap immikkoortortaani nakorsaaneq Eskild Boeskov isumaqarpoq.
Puulukip nualluutaa Kalaallit Nunaannu anngutissappat Ilulissat eqqugaaqqaarnissaat ilimanaateqarnerpaavoq, knr.gl allappoq.
Tunillatsittoqassagaluarpat puulukip nualluutaanut akiuussutsissamik nunatta immikkoortortaani piareersimasoqanngilaq. Akiuussutissat Nuummi nunatta apotekianiipput, napparsimalersoqassappalli pilertortumik nassiunneqarsinnaapput.
Kisitsisilli maannamut takutippaat puulukip nualluutaa nualluutinut nalinginnaasunut sanilliullugu amerlanerusunit toqqutigineqartanngitsoq.
- Nakorsaateqarpoq, nammaammut unikaallatsitsisinnaasumik, maannakkullu akiuussutissamik suliaqartoqarluni, nunap immikkoortortaani nakorsaaneq Eskild Boeskov oqarpoq.
Ileqquusoq naapertorlugu sinerisami tamarmi nuallulersimasut tamarmik nalunaarsorneqarput. Peqqinnissaqarfimmiillu nalunarsuineq sukannernerulersinneqarpoq, taamaalilluni aamma toqqusaaniit peersinikkut misissugassaliisoqartarluni.