Ilaqutariinni qeerlutuuarapalaatut misigisimavunga
Helene Thiesenip 1951-imi Danmarkiliartitaasinnarluni Nuummi meeqqat angerlarsimaffiannut pisinneqarsimanera kinguneqarnerlorujussuarsimavoq. Tamanna ungasinngitsukkut filminngorlugu takussavarput.
Helene Thiesenip ukiuni 65-ini inuusimanera qullinik apeqquterpassuarnillu ulikkaarsimavoq.
Tassa arfineq-marlunnik ukioqarluni ataatami toqunerata kingorna arni, angajuni aqqalussanilu qimallugit kalaaliaqqanik allanik 21-nik ilaqarluni umiarsuarmik Danmarkiliartitaasimagami.
Ukiut aappaat avillugu qaangiummat umiarsuarmik Kalaallit Nunaannut uterpoq.
Heleneli anaanaminut qatanngutiminullu utinngilaq. Nuummi Røde Korsip meeqqanut angerlarsimaffianut inissinneqarpoq, kalaaliaqqat pikkorissut qallunaatuinnaq oqaluttut ilagissagamigit. Ilaquttani Nuummi illoqarfeqatigaluarlugit qaqutiguinnaq najortarpai.
Sooq taamaattoqarnera pillugu nassuiaanneqanngisaannarpoq. Meeraq Helene apeqqutissarpassuaqaraluarpoq.
Sooq arnaata tigoqqikkumanngilaa? Tigoqqikkumannginnamiuk?
– Ullumikkut ajunngitsumik inuuneqarpunga. Sunali peqqutaanersoq nalullugulu qiasaqaanga. Pisimasut tunulequtaat ilisimanngilakka, Sermitsiameersup angerlarsimaffimminut Vordingborgip avataani Stensvedimiittumut pulaarmani oqaluttuarpoq.
Helene Thiesenip apersorneqarnerata sinnera Sermitsiami atuaruk...