Meeqqanut katersuiniarneq tapersersorluarneqartoq
Søs Fenger, Julie Berthelsen, Caroline Henderson, ABC X factorimi peqataasut aamma Else Lennert erinarsortartut ilusilersuisartullu tusaamasat akornanni peqataassapput Meeqqanut Inuusuttunullu suliniaqatigiiffik Nanu Nuummi katersuiniartitsilerpat.
Katersuiniarnermi maajip 8-anni 9-annilu ingerlanneqartussami anguniarneqarpoq meeqqanut inussuttunullu kinguaassiutitigut atornerlugaasimasunut illumik pilersitsinissaq aammalu Kalaallit Nunaanni illoqarfinni nunaqarfinnilu tamani meeqqat inussuttullu ornittagassaannik pilersitsinissaq.
Katersuiniarnermik aaqqissuussisuuvoq Meeqqat Inuusuttullu pillugit suliniaqatigiiffik Nanu, taassuma suliniaqatigiffiit pingasut allat suleqatigileqqammerpai: Meeqqat INuunerissut/Bedre Børneliv, Red Barnet aamma ICC-ip inussuttunut suliniaqatigiiffiat ICYC.
Aaqqissuussineq aamma namminersortunit suliffeqarfinnillu arlalinnit tapersersorneqarpoq.
- Taamatut suleqatigiinnikkut oqariartuutiginiarparput tunuliaqutarisat, isummat assigiinngissutsillu akimorlugit suleqatigiinneq ilumut allanngortitsisinnaanermut pisariaqartuusoq, Meeqqat Inussuttullu pillugit suliniaqatigiiffiup Nanup siulittaasua Kristine Winberg oqarpoq.
Katersuinarneq Katuami aamma Air Greenlandip hangariani atisalianik takutitsinerullunilu nipilersornermik takutitsinerullunilu tusarnaartitsinerussaaq, peqataasussat tassaallutik:
Helene Steensby, Charlotte Sparre, Henriette Zobel, Isaksen design, Lennart Design, Jim lyngvild, Søs Fenger, Caroline Henderson, Nina Kreutzmann meeqqat erinarsoqatigiit peqatigalugit, Julie Berthelsen, ukioq manna X-factorimi normu 2-jusut, Alien Beat Club, Annemette Fogh Rasmussen aamma Thomas Evers Poulsen - Vild med Dans-imeersut, Sonnick aamma David kiisalu Nuuk Posse.
katersuiniarnermi peqataasut aaqqissuisuusullu namminneq kajumissutsiminnik akissarsiaqaatiginagulu sulipput, aamma erinarsortartut, ilusilersuisartut allallu Danmaekimiit tikeraartut, Kristine Winberg ilisimatitsivoq.
KNR-ip Nuuk TV suleqatigalugu nuna tamakkerlugu katersuiniarneq nuna tamakkerlugu tv-kut aallakaatissavaa.
- Takutikkusupparput inuunermut piareersimalluta aammalu kalaallit meerartaannut ilaqutaannullu assigiimmik atugassaqartitsinissamik neqerooruteqarnissamut iliuuseqarluta - sermersuaq, qaqqat, imaq, anori silalu akimorlugit. Nukissagut pisariaqartagut pigaagut. Piumagutta, Kristine Winberg oqarpoq.