Dækkit aasarsiutit ikkutikkit
Ukiup Kunngiata Kalaallit Nunaanni sila iperarusuppallaanngikkaluaraa inatsisit malillugit biiliti aasarsiutinik assakaasulertussaapput.
Annonse
Maniitsumi angutip maajip 1-iani dækkit ukiorsiutit aasarsiutinik taarsersimanngimmagit pillaammik akiligassap allagartaanik tunineqarpoq.
Tamanna Maniitsumi politeeqarfimmi pisortap sermitsiaq.gl-imut ilisimatitsissutigaa, tassani maajip aallaqqaataani inatsisit malinneqarsimanersut misissuiffigisimavaat. Biilit 81-it misissorneqarput, ataatsillumi biilileriffimmukarluni taarsiisussanngornermi saniatigut allakkerivimmut pillaammik akigassani 500 kr. akileriartortariaqarsimavaa, pillaammik akiligassanngortitsinerup annertussusia.
Maajip aallaqqaataa ulloq taannaavoq dækkinik taarsiiffissaq, ullorsiutit malillugit aasap silaa atuutilereertussaagaluarpoq, naak Kalaallit Nunaat tamaat isigissagaanni anorlertarlunilu apisaqattaartaraluartoq.