"Oqarit! Inuullutillu" angalassapput

Nuummi marsimi iluatsitsilluareerluni aaqqissuisartoq ilitsersuisorlu Pipaluk K. Jørgensen nunatsinni angalatitsiniarpoq isiginnaartitsissut "Oqarit! Inuullutillu" isiginnaartitsissutiginiarlugu.

"Oqarit! Inuullutillu" piviusut tunngavigalugit isiginnaagassiaavoq sakkortooq, maanna Nunatsinni illoqarfinni arfineq pingasuni takutinneqassaaq. Assiliisoq: Leiff Josefsen.

Isiginnaagassiap "Oqarit! Inuullutillu"-p kinguaassiutitigut atornerluisarneq sammivaa, pissusiviusut tunngavigalugit isiginnaartitsissutaalluni, taamaattumik sakkortusinnaavoq misigissutsikkut annernartumik eqquisinnaalluni.

Oqariartuutigaali pisut pillugit oqaloqatigiittarnissarput pingaaruteqartoq, isiginnaartitsinerullu nalaani aamma oqallisissiat aallarniutillu saqqummiunneranni illoqarfinni isiginnaartitsiviusussani sillimasussanik piareersimasoqassaaq.

Isiginnaartitsissutinik pilersitsisartoq ilitsersuisartullu Pipaluk K. Jørgensenip illoqarfiit arfineq-pingasut tikitassatik paquminartut pillugit, soorlu imminortarneq aamma meeqqanik inuusuttuaqqanillu kinguaassiutitigut atornerluisarneq pillugit, oqallitsitsitsinissamik imaluunniit aallarniuteqarnissamut kajumissaarpai.

- Neriuppunga amerlasuut suliniut tamanna tapersersorumaaraat, isumaqarpungalu pingaartuusoq isiginnaartitsineq aqqutigalugu paquminartut oqaluuserineqartanngitsullu sammineqalersinnaasut, Pipaluk K. Jørgensen oqarpoq.

Air Greenlandimit Katuaq suleqatigalugu isiginnaartitsineq tapersersorneqarpoq, angalanissamut billitsinut akit 50 procentimik akikillineqarmata.

Tips og Lottomidlerne Nunatsinni angalanissaq aamma aningaasaliiffigaat, taamatuttaaq Paarisa/Inuunerittalu Nunatsinni imminoortarnermik aamma kinguaassiutitigut atornerluisarnermik pinaveersaartitsinissamut atatillugu.

Illoqarfiit arfineq pingasut tikitassat:

Ilulissat - 8. maj -10. maj - isiginnaartitsisoqarluni 9. maj.

Aasiaat - 10. maj – 13. maj - isiginnaartitsisoqarluni 12. maj.

Sisimiut - 13. maj – 16. maj - isiginnaartitsisoqarluni 15. maj.

Maniitsoq - 16. maj – 19. maj - isiginnaartitsisoqarluni 17. maj.

Tasiilaq - 20. maj – 23. maj - isiginnaartitsisoqarluni 22. maj.

Qaqortoq - 26. maj – 28. maj - isiginnaartitsisoqarluni 27. maj.

Narsaq - 28. maj – 30. maj - isiginnaartitsisoqarluni 28. maj.

Paamiut - 30. maj – 3. Juni - isiginnaartitsisoqarluni 1. juni.

Isiginnaartitsisut tassaapput Arnatsiaq Reimer Eriksen, Vilhelm Egede, Mike Thomsen og Pipaluk Kreutzmann Jørgensen.

Powered by Labrador CMS