Nordisk Musikprisimut innersuussisoqanngilaq
Juaaka Lyberthip uggoraa Kalaallit Nunaanniit Nordisk Musik Pris 2009-mut innersuussisoqannginnera. - Arlaata arajutsisimassavaa, oqarpoq.
- Kalaallit Nunaata ukiut marluk tulleriisinnarlugit pilerigineqarluartartumut Nordisk Musikprisimut innersuussisarnermi peqataanngitsoortarnera assorujussuaq uggornarpoq.
Nordisk Musikprisimik nersornaaserneqarnissamut periarfissat annikiginarsinnaagaluartut innersuussaasut ilisaritinneqartarnerat kalaallit nipilersortartut nunani avannarlerniinnaanngitsoq aammali nunarsuup sinnerani ilisaritinneqarnissaannut periarfissatsialassuuvoq.
Innersuussaanermi imminik nersornaataavoq, Sisimiuni kulturikkut illorsuarmi Taseralimmi pisortaq, KODA-p Greenland Awards 2008-mi siulittaasoq aammalu Nordisk Musikkomitemi Nomusimi 1996-2007-imi Kalaallit Nunaata sinniisaa Juaaka Lyberth isumaqarpoq.
Malittarisassat malillugit kultureqarnermut naalakkersuisoq taassumalu naalakkersuisoqarfia Nordisk Musik Prisimut innersuussisussaavoq.
- Arlaata arajutsisimassavaa. Qanorluunniit pisoqarsimagaluarpat Kalaallit Nunaat nunat avannarliit nipilersornikkut suleqatigiinnerannut peqataannginnera assorujussuaq uggornarpoq, Juaaka Lyberth oqarpoq.