Mary Nuummukassaaq

Kunngissap nuliata aningaasaateqarfimmini Mary Fondimi siulittaasuunini tunuliaqutaralugu Nuuk tikeraassavaa suliniummini suleqatit ataatsimeeqatigiartorlugit.

Assi: Kim Nielsen, Polf

Kunngissap nulia Mary, Mary Fondimi siulittaasutut fondip allattaa peqatigalugu Nuummut juunimi tikeraassaaq, Fondip suliniutaanut ullumikkumut ilaasarsimasut aammalu siunissami akuutinneqartussat ataatsimeeqatigalugillu isumasioqatigissallugit.

Tikeraarneq pissaaq kunngikkormiut ilaqutariit Kalaallit Nunaanni namminersornerup atuutilernissaanut atatillugu tikeraarnissaat ullualunnik sioqqullugu.

- Kalaallit Nunaat Savalimmiullu suliniuteqarfitsinnut ilaapput taamaattumillu suliniutinut saqqummiussatsinnut pissusissamisoortumik eqqarsaatigineqartarlutik. Taamaattumik tikeraarnitta pingaarnertut siunertaraa suliat ingerlareersut ingerlateqqinnissaat anguniarlugulu suliniutigisattalu iluani peqataatinneqartorpassuit ilaannik nutaanik aallartitsinissamut oqaloqatigiinnerit ingerlatissallugit - 'angerlarsimaffimmi nakuuserneq' aamma ' qinngasaarisarneq toqqissisimanerlu'. Suliniutitta kalaallit kulturiannut, aaqqissuussaanerannut oqaasiinullu tunngatillugu najukkami pissutsinut naleqqussarnissaat pingaartorujussuuvoq, kronprinsesse Mary tikeraarnissaminut tunngavigisani pillugit oqarpoq.

- Tikeraarnitsigut neriuutigaarput kalaallit nunaanni meeqqerivinni atuarfinnilu meeqqat akornanni qinngasarisarnernik pitsaaliuinissamut siunniussat maannakkorpiarlu iliuusissatut pilersaarutit amerlasuut ataatsimoorullugit qanoq pitsaanerpaamik tapersersorsinnaanerigut annertunerusumik ilikkagaqarfigisinnaanissaat. Peqatigitillugu tikeraarnerput ajornartorsiummut imaannaanngitsumut angerlarsimaffinni nakuusertarnerup ajornartorsiummut imaannaanngitsuunera pillugu annertusisamik paasisaqarnerulernissamut pilersaarutinut pioreersunut suliniutinullu tunngatillugu illuatungerilluni oqaloqatigiinnissamut iluaqutaasinnaassasoq, Birgitte Hagemann Snabe, Mary Fondimi pisortaasoq oqarpoq.

Mary Fondip ullumikkut meeqqanut Kalaallit Nunaanni qimarnguinniittartut atortussaanik assingiitsunik soorlu pinngussanik atuakkanillu assigisaanillu agguaasinerit ingerlatarai, suliniut angerlarsimaffimmi nakuusertarnermut attuumassuteqartoq aammalu pissusissamisoortumik Danmarkimi, Kalaallit Nunaanni Savalimmiunilu suliniutigineqartut.

Powered by Labrador CMS