Ministeri: Takornariartaatit ingerlaqatigittassapput
Isumannaallisaaneq pingaartillugu takornariartaatit marlukkuutaarlutik ingerlaqatigiittariaqarput. Danmarkip IMO-mi malittarisassat nutartertinniarpai.
Kalaallit Nunaata imartai umiarsuarsuit takornarniartaatit amerliartuinnartut tikittalerpaat, Sikuiuitsullu sermia aakkiartuinnartillugu umiarsuit ornittagaat avannarpariartuinnarput.
Tamanna Kangilinnguani Sakkutooqarfimmit assut isumakuluutigineqarpoq. Umiarsuarsuarmimmi tusindtinik arlalinnik ilaasulimmik umiiartoqassagaluarpat ilaasut nunamukaanneqarsinnaagaluarput, sumiitinneqassappalli, inissaqassappat, knr.gl allappoq.
Taamaammat Sakkutooqarfiup kissaatigaa umiarsuit marlukkaarlutik tamatigut angalaqatigiittalernissaannik Imarsiortut nunarsuaq tamakkerlugu Kattuffiat, IMO, inatsisiliussasoq, umiarsuarmik ajutoortoqassagagaluarpat inuttai umiarsuup aappaani oqqiffissaqarniassammata.
Suliassaq Danmarkimi illersornissamut ministerip, Søren Gade-p, tusaatissatut tiguaa, ajunaarnersuarmimmi qaquguluunniit eqqugaariaannaavugut:
- Pisussaatitaaffiup taassuma piviusunngornissaa sulissutigaarput, kisianni tassa IMO-mi, Imarsiortut nunarsuaq tamakkerlugu Kattuffissuata inatsisai allanngortikkuminaatsorujussuupput, apeqquteqaalli Danmarkimiittuusugut soqutiginartittorujussuuvarput, apeqqutaanngilarmi ajunaarnersuaqassagaluarpat, kisiannili ajunaarnersuaqarpat qanoq iliussaagut?, Søren Gade Danmarkip Radioanut ullumi oqarpoq.