Kalaallit atisaliassanik ilusilersuisartut Islandimi
Kalaallit atisaliassanik ilusilersuisartut tallimat Reykjavikimi atisanik saqqummersitsipput.
Reykjavikimi Nunat Avannarliit Illuutaanni kalaallit ilusilersugaannik atisaliat ulluni makkunani saqqummersinneqarput. Atisaliassanik ilusilersuisartut Rita Isaksenip, Nickie Isaksenip, Nauja Lynge Lyngesenip, Else Lennertip aamma Else Møllerip ilusilersugaat saqqummersitsinermi ”In front of Creativity- Nordic Fashion Design”-imi ilaapput.
Atisaliassanik ilusilersuisartut allat Islandimeersut Savalimmiuneersullu atisaliatik aamma saqqummersippaat, saqqummersitaat tassaallutik Islandimiit, Savalimmiuniit Kalaallit Nunaanniillu atisat pinnersaatillu.
- Savalimmiormiut islandimiullu atisaliassanik ilusilersugaat assut soqutigineqarput, kisianni aamma kalaallit ilusilersugaat soqutigineqarluarput, ilusilersuisartoq Else Møller oqarpoq. Taassuma saqqummersitsinermi saqqummersippaa puisip amianik kavaajaliaq orangiaq takisooq.
Nauja Lynge Lyngesenip saqqummersitsinermi saqqummersippaa atequt eqalussuup amianik sanaaq alutornarluinnartoq, puisip amianik kavaajaliaq takusooq qorsuk kusanarluinnartoq, taksit pinnersaatillu.
Nunat avannarliit killernit atisaliaannik saqqummersitsineq 2009-mi apriilip 5-iata tungaanut takusarneqarsinnaapput.
Assilisat aamma takukkit uani.