Meerartaarsimasut ikiorserneqartartut amerlipput

Annertussusileriikkamik ikiorsiissutinik, meerartaarnermi sulinngiffeqarnersiutinik utoqqalinersiutinillu pisartagartut 2007-imi amerlisimapput. Akerlianik pisariqartitsineq naapertorlugu ikiorsiissutinik ataasiaannartumillu ikiorsiissutinik pisartagaqartut ikileriarsimapput.

Erninermi sulinngiffeqartarneq sivitsorneqarsimavoq, taamaammallu sulinngiffeqarnermusiat amerlanerulersimagunarpoq. Assi: Polfoto/ Magnus Müller

Kalaallit Nunaanni Naatsorsueqqissaartarfimmit kisitsisit kingulliit tamanna takutippaat.

Annertussusileriikkamik ikiorsiissutini erninermullu atatillugu sulinngiffeqarnermi ulormisianut tunngatillugu pisartagallit 6,9 procentimik amerleriarsimapput, aningaasallu tigusartagaat 32 procentinik qaffallutik.

Utoqqalinersianik tigusartagaqartut 5,7 procentinik amerleriarsimapput, aningaasat tigusaat 15 procentinik qaffassimallutik. Utoqqalinersiallit 2006-imut sanilliullugu 217-inik amerleriarsimapput.

Erninermut atatillugu sulinngiffeqarnermi ullormusianut tunngatillugu aningaasat tunniunneqartartut qaffariapiloorsimallutik 57,8 procentiupput, tigusartagaqartut amerlassusiat 13,6 procentimik qaffassimalluni. Tamatumunnga tunngaviuvoq 2006-imi juulip 1-iani angajoqqaat erninermut tunngatillugu sulinngiffeqartarnerat sivitsorneqarmat, Kalaallit Nunaanni Naatsorsueqqissaartarfik nalunaarpoq.

Pisariaqartitsineq naapertorlugu ikiorsiissutinik pisartagallit ataasiaannartumillu ikiorsiissutinik pisartagallit 2007-imi ikileriarsimapput, tamatumunngalu peqqutaasinnaavoq, kommunit ilaanni suliffissat amerlanerulersimanerat. Inuit ikiorsiissutinut allanut nuunneqarsimasinnaaneranni aamma peqquteqarsinnaavoq.

Powered by Labrador CMS