Pisisinnaassuseq 2007-imi appariarpoq

Kisitsisit nutaat takutippaat 2007-imi pisisinnaassuseq appariarsimasoq. Peqatigitillugu kisitsisit takutippaat illoqarfinni nunaqarfinnilu isertitatigut assigiinngissutsit nikingasorujussuusut.

Assi: Polfoto/Thomas Borberg.

2007-imi akit qaffaataat 5,4 procentinut iluarsigaanni aningaasarsiaviit 2,6 procentinik appariarput, tamanna Kalaallit Nunaanni Naatsorsueqqissaartarfiup »2007-imi isertitat naatsorsuutaat«-ni takuneqarsinnaavoq. Taamaalilluni pisisinnaassuseq appariarpoq.

Agguaqatigiisillugu ukiumut 170.000 kr.-inik isertitaqartarpugut. Kommune agguaqatigiisitsinermit taassuminnga qaangiisimasoq tassaavoq Kommuneqarfik Sermersooq, tassani agguaqatigiisillugu isertitat 210.000 kr.-iupput.

Qeqqata kommuniani agguaqatigiisillugu isertitat 168.000 kroniupput, isertitakinnerpaat Kommuneqarfik Kujalleq aamma Qaasuitsup Kommunianiillutik, taakkunani tulleriinneri malillugit 146.000 kroniullutillu 133.000 kroniupput.

Isertitaqqortussuseq illoqarfinni 179.000 kroniusut nunaqarfinni 98.000 kroniupput, "Nunaqarfiit mittarfeqarfiusut" Narsarsuaq Kangerlussuarlu ilanngunnagit naatsorsuigaanni. Taamaalilluni nunaqarfimmiu nalinginnaasumik 55 øremik akissarsisartoq illoqarfimmiu agguaqatigiisikkaanni 1 kronimik akissarsisarpoq, Kalaallit Nunaanni Naatsorsueqqissaartarfik allappoq.

Illoqarfiit nunaqarfiillu akornanni nikinganerujussuarmi ukioqqortussuseq apeqqutaasorujussuuvoq. Taamaalilluni isertitatigut nikingassutsit anginerit inuussutissarsiorsinnaassutsip 25-inik ukiulinniit 64-inik ukiullit iluanni takussaanerpaavoq. Inuusunnerpaani utoqqaanerpaanilu isertitat illoqarfinni nunaqarfinnilu agguataarnerat assigiiaakannerpoq.

Powered by Labrador CMS