Telefonikkut ikiuisarfik unippoq
Peqatigiiffik »Kisiminngilatit« ingerlaqqissinnaajunnaarpoq, oqarasuaatikkullu siunnersuisarneq unippoq.
Ukioq kingulleq inunnit ajornartorsiuteqartunit 358-eriarluni sianertoqartarsimagaluartoq peqatigiiffik »Kisiminngilatit« uninniarluni aalajangerpoq, taama KNR-ip radioaviisia paasissutissiivoq.
Tamatumunnga pissutaavoq peqtigiiffiup ataatsimiinnerinut inuit takkunneq ajornerat, aningaaserisoq oqaloqatiginnittartorlugu Atsa Schmidt oqarpoq. Taamatut tapersersuisut amigaataanerat peqatigiiffimmi nammineq kajumissutsiminnik sulisut sinnerinut nukkiorfinngorsimavoq, taamaattumik taakku peqatigiiffiup atorunnaarsinnissaa qaammat kingulleq aalajangersimavaat.
Peqatigiiffik 1990-imi aallartinneqartoq ukiut tallimat matuma siorna peqatigiiffittut ingerlalerpoq. Peqatigiiffiup oqaloqatiginnittartuisa ulloq unnuarlu inuit imminornissaminnik eqqarsaateqartut, kinguaassiutitigut atornerlugaasimasut inooqatigiinnermikkullu ajornartorsiuteqartut sianeraangata oqaloqatigisarsimavaat.