Per B.-p Hillary Clinton naapissavaa
Naalakkersuisunut ilaasortap USA-p nunanut allanut ministeria Washingtonimi sapaatip akunnerata tulliani issittumi politikki pillugu oqaloqatigiinnissami Naalagaaffeqatigiiffik sinnisuuffigissavaa.
Aningaasaqarnermut Nunanullu allanut tunngasunut naalakkersuisoq Per Berthelsen, Siumut, Hillary Clintonimik nunanilu issittuni nunanut allanut ministerit ataatsimiinnissaannut qaaqqusaavoq, issittumi politikki oqaluuserissallugu. Ataatsimiinneq USA-p nunanut allanut ministeriaqarfiani Washington D.C.-mi ataasinngornermi pissaaq, kingornalu nereqatigiinneqarlunilu ilasseqatigiittoqassaaq, Per Berthelsen sermitsiaq.gl-imut ilisimatitsivoq.
Danskit nunanut allanut ministeriat Per Stig Møller peqataasinnaanngimmat Kalaallit Nunaat qinnuigineqarsimavoq Naalagaaffeqatigiiffik sinnerlugu peqataaqqullugu. Per Berthelsenip qaaqqussut nunannaarutigaa, taannalu qaaqqisussut Naalagaaffeqatigiiffiup Issittumi Siunnersuisoqatigiinnut siulittaasunngunngitsiarnerani takkuppoq.
– Ukiut tulliuttut marluk Kalaallit Nunaannut pingaaruteqartorujussuussapput. Issittumi pissutsit assut sammineqarput, taamalu Issittumi Siunnersuisoqatigiit isummanik anitsiviuvoq pitsassuaq, tassanilu isummatsinnik anitsinissamut periarfissaqarpugut, Per Berthelsen oqarpoq.
Peqatigitillugu Hillary Clintonimik naapitsinissaminut qilanaarpoq.
– Assorsuaq pissanganarpoq, aamma Kalaallit Nunaata Naalagaaffeqatigiiffik toqqaannartumik sinniisuuffigisussaammagu tulluusimaarutissaraarput, Per Berthelsen oqarpoq.
Issittumi Siunnersuisoqatigiinni ilaasortat saniatigut aamma nunat Sikuiuitsoq Kujalleq pillugu isumaqatigiissummi atsioqataasimasut aallartitaqassapput. isumaqatigiissut ukioq manna ukiunik 50-inngortorsiorpoq. Sikuiuitsut taakku marluusut aatsaavissuaq marluutillugit ataatsimooqatigiinnermi oqaluuserineqassapput, nunanut allanut tunngasunut pisortaqarfimmiit Inuuteq Holm Olsen ilisimatitsivoq. Ataatsimiinnermut peqatigitillugu nunat tamat issittumut ukiorititaat IPY naassaaq. Kisianni nunarsuup issittortaanni suli ilisimatusarnissaq pisariaqartinneqarpoq.
– Issittumi ilisimatusarnerup annertunerulersinneqarnissaanik pisariaqartitsineq ataatsimiinnermi erseqqissarneqassaaq, Inuuteq Holm Olsen oqarpoq.
Ataatsimiinnermi pisussat talerpiatungaani takuneqarsinnaapput.