Kristian Jeremiassenip Atassut qimappaa
Inatsisartunut ilaasortaq Kristian Jeremiassen Atassummit anilluni nalunaaruteqarpoq. Partii takorluukkaminik anguniagakippallaaqaaq, inatsisartunullu qinersinissamut atatillugu piareersarnikippallaarluni.
- Inatsisartut ukioq kingullermi ukiakkut ataatsimiinneranni neriorsorneqarpunga piareersarnerit ataatsimiinnerup kingorna aallartissasut. Kisianni suli susoqarsimanngilaq. Aamma immikkoortortaqarfinni susoqarsimanngilaq. Taamaattumik Atassummit anivunga, Kristian Jeremiassen, Qaasuitsup Kommuniani kommunalbestyrelsimi aamma ilaasortasoq, oqarpoq, knr.gl taama allappoq.
Kommunalbestyrelsi eqqarsaatigalugu Kristian Jeremiassenip partii Siumut teknikkikkut suleqatigilerniarlugu siunniusimavaa:
- Inatsisartuni kommunalbestyrelsimilu sulinera ingerlatiinnassavara, siunissamilu siumut suleqatigissallugu, Kristian Jeremiassen oqarpoq.
Kristiaalli Siumumut ilaasortanngussanerluni annerusumik oqaaseqarfiginianngilaa. Taamaaliunngippat naalakkersuisooqatigiit Inatsisartuni ikinnerussuteqalersinnaapput.
Kristian Jeremiassen Atassut sinnerlugu NunaFondimi ilaasortaagaluarpoq. Partii maanna ilaasortassamik nutaamik toqqaasussanngorpoq.