Nalunnguariaq normu 1.000.000
Poorskip aapaani naluttarfik Malik nalunnguariartut 1 millionissaannik iserfigineqarpoq.Tassaappullu Solvej Gudmansen aamma ernera Nicolai.
Kommuneqarfik Sermersuup borgmesteriata Asii Chemnitz Narupip poorskip aappaani makiaarluni naluttarfik Malik ornippaa, tamaanga nalunnguariartut millionissaat pilluaqqujartorlugu.
- Naluttarfimmut Malimmut isertartut ingerlaavartumik nalunaarsorneqartarput aamma qaammatit tamaasa nalunaarfigineqartarpugut qassit tamaanga isersimanersut.
Kommunalbestyrelse sinnerlugu inuttaasut tamaasa qamannga pisumik qutsavigaakka, taama eqinnaatsigalusi Malik atortuartarassiuk - minnerunngitsumik illit nalunnguariartut millionissaat qujanarujussuaq kiisalu pilluangaarit.
- Tamatta nalunngilarput nalunnguarnerup peqqissutsimut sunniutai pitsaasut. Atuisartut amerlasoorpassuit tamanna uppernarsarpaat tamatumunngalu ilutigitillugu maani sulisut inussiarnerlutik pikkorillutillu sullissiuarnerat nersualaartarlugu. Taamaattumik periarfissaq manna iluatsillugu aamma pisortamut Calle Tøttrupimut sulisuinullu tamanut ullut tamaasa sulilluartarnersi pillugu qamannga pisumik qujaniarpunga. Aammattaaq ilissi pilluaritsi. Neriuppunga naluttarfipput ukiorparujussuarni suli illoqarfimmi innuttaasunut iluaqutaalluarumaartoq, Asii Chemnitz Narup oqarpoq.