Qitequtaasaq eqqaamajuk
Innuttaasut påskep kingorna sapaatit akunnerini tulliuttuni unngerlaasat atinissaat, niaqorornaveeqqutip atinissaa biilinillu ingerlatilluni qulliit ikinnissaat eqqaaseqqinneqartassapput, politiiniit paasisitsiniaanermut annertulaamut atatillugu.
Kalaallit quliugaangata qulingiluat angallannermut inatsisit nutaat iluarisimaarpaat. Taamaakkaluartoq unngersaasat atinissaat ilaasa suli puigortarpaat. Paasititsiniaanikkut angallattunillu misissuinikkut innuttaasut unngersaasat atinissaannik niaqorornaveeqqutillu atinissaannik eqqaasinneqaqqittassapput.
Paasititsiniaaneq siullerpaamik ukioq kingulleq ukiakkut ingerlanneqarpoq, ilaatigut TV-kkut takutitassiaaqqatigut radiokkullu tusagassiaaqqatigut. Inuit quliugaangata qulingiluat malittarisassat nutaat iluarisimaaraluaraat sisamagaangata pingasut isumaqarput malittarisassat malissallugit eqqortuusoq, taamaattumik ilaasa biilinut snescooterinulluunniit ikigaangamikmalittarisassat eqqaamaneq ajorpaat.
Kalaallit Nunaanni politimesterip tullia Morten Nielsen oqarpoq:
- Aqqusinerni malugisarparput inuit ilaasa unngersaasat atinissaat suli puigortaraat. Kisianni aamma ileqqut allanngortiarlugit sivisusinnaasarpoq, taamaattumik inatsisit allannguutaat eqqaasitsissutigeqqissallugit pisariaqarpoq.
Kalaallit Nunaanni angallannikkut inatsisit 2008-mi oktobarip 1-iani atuutilerput. Angallannikkut inatsisit arlalitsigut allannguuteqartinneqarput. Pingaarnerit arfinillit ukuupput:
Unngersaasat inatsitigut pinngitsoorani atugassaapput meeqqallu atortuni akuersissutaasuni ingitillugit qajannaarsimassallutik, niaqorornaveqquutit atornissaannut piumasaqaatit annertusisat, promilleqassutsip 0,8-miit 0,5-imut allanngornera aammalu ingerlatilluni mobili tigummillugu oqaloqateqarneq inerteqqutaalluni, ingerlatilluni qulliit ikumanissaannik poumasaqaat, snescooterinik ingerlatsitsisinnaanermut ukiut 16-iniit 18-inut qaffanneqaranerat.
Kalaallit Nunaanni Politiit nittartagaanni matittarisassat pillaammillu akiliutit qanoq inissisimaneri takuneqarsinnaapput: www.politi.dk/groenland.