Qinersinissamut isumasiuinerit marluk
Juunip 2-anni inatsisartunut qinersinissaq sioqqullugu HS Analyse suleqatigalugu Sermitsiaq qinersisartunik marloriarluni isumasiuisassaaq.
Isumasiuineq siulleq sapinngisamik piaarnerpaamik ilanngukkumaarparput; aappaalu sapinngisamik qinersinissaq qaninnerpaanngorpat.
Ullumikkulli qularnaatsumik oqaatigereersinnaavarput Inatsisartut allanngortorujussuussasut, 2005-imi novemberip 15-ianni qinersinermut sanilliullugu.
Inatsisartunut ilaasortat arlalissuit qinigassanngorteqqissanngillat, Demokraatillu ukiup kingulliup ingerlanerani ima allanngorsimatigaaq, Ludo-rtartutut angerlartitaalluni aallaqqaataanit aallartissalluni.
Partiinut nikittut
2005-imi novemberip 15-ianni qinersinermi qinigaaffiit imatut agguataarsimapput:
Siumut 10
Inuit Ataqatigiit 7
Demokraatit 7
Atassut 6
Kattusseqatigiit Partiiat 1
Inatsisartuni 31-inik ilaasortalinni amerlanerussuteqassagaanni 16-iusariaqarpoq.
Qinigaaffimmi matumani arlalissuit partiinut nikittarsimapput, paasiuminaallisitsisarsimasunik:
Per Berthelsen, Marie Fleischer, Esmar Bergstrøm aamma Kristian Jeremiassen - tassa partiini nikittut ilaat sisamat.
Nikerarnerujussuaq
Ukiut 3 1/2 matuma siornatigut qinersinermut sanilliullugu inuit arlallit taarserneqassapput, immaqalu suli amerlanerit.
Atassut: Peersimapput Ellen Christoffersen, Thomas Kristensen aamma Augusta Salling.
Siumut: Peersimapput Lars-Emil Johansen, Jørgen Wæver Johansen aamma Agnethe Davidseniugaluaq.
Inuit Ataqatigiit: Peersimapput Johan Lund Olsen aamma Asii Chemnitz Narup.
Demokraatit: Peersimapput Per Berthelsen, Lene Knüppel, Marie Fleischer, Anne Marie Schmidt aamma Esmar Bergstrøm.