Air Greenland inissitsiterluni ataatsimiissaaq

Naalakkersuisut Julia Pars Air Greenlandip siulersuisinut ilaasortanngorteqqinniarlugu aalajangereersullu timmisartuutileqatigiit tallimanngornermi kingusissikkut inissitsiterilluni ataatsimeersuassaaq.

Sisamanngornermi ataatsimeersuarnermit. Assi: Leiff Josefsen

Nalinginnaasumik ataatsimiinnermi ippassaq sisamanngornermi apriilip 16-iani 2009, naalakkersuisut Bjarne Eklund qinigaaqqittussatut Lars-Emil Johansenilu Julia Parsimik taarsiisussatut inassutigisimavaat. Kisianni Lars-Emil Johansen ippassaq unnukkut nalunaarpoq, nammineq siulersuisuniit tunuarniarluni, pissutsillu allanngorput. Tamatuma kingorna naalakkersuisut Julia Pars toqqagaaqqinnissaa siunertaralugu attavigeqqippaat.

- Air Greenlandimi suliama ingerlateqqissinnaalernissaannut periarfissinneqarnera assut nuannaarutigaara. Piareersimaffigiuaannarsimavara, taamalu timmisartuutileqatigiit suliffeqarfittut aningaasaliissuteqarusussusilittut niuernerpalaartumillu ingerlatsisuunissaa pillugu ukiunut tallimanut siumut periusissatut pilersaarummik ingerlatseqataanissannut nukissaqarlunga piumassuseqarama.

Siulersuisut nutaat piaarnerpaamik inissitsitissapput. Kalaallit Nunaanni Namminersornerullutik Oqartussat ilaasortaatitaasa Bjarne Eklundip aamma Julia Parsip saniatigut ilaasortaapput danskit naalagaaffiata sinniisuutitai Mads Kofod aamma Lars Tyberg, SAS-ip sinniisuutitaa Lars Lindgrén kiisalu sulisut sinniisuutitaat Claus Motzfeldt, Elisaberth Fisker aamma Niels C. Frederiksen.

Air Greenlandip piginnittorai Kalaallit Nunaanni Namminersornerullutik Oqartussat SAS-ilu tamarmik aktiat 37,5 procentiinik piginnittut aamma danskit naalagaaffiat 25 procentinik.

Powered by Labrador CMS