Nanortallip eqqaani tallimat annaanneqartut
Umiatsiaaraq tallimanik issimasulik, ataaseq meeraq ataatsimik ukiulik, sakkutuut imarsiortut alapernaarsuutaata Ejnar Mikkelsenip inuttaanit sikorsuarniit annaanneqarput.
Tallimanngormat unnukkut Qaqortumi politiit Kangilinnguani sakkutooqarfimmut ikioqqullutik attaveqarput.
Nalunaarutigineqartoq tassaavoq umiatsiaaraq maqaasineqartoq. Ilaqutaasut umiatsiaaqqamiittut arlaleriarlutik oqarasuaatikkut angallattakkakkut attaveqarfigisarsimavaat. Issimasuupput inuit tallimat taakkuninnga ataaseq meeraq ataatsimik ukiulik.
Sumeerpiarnersut nalornissutigineqarpoq, kisianni taakku tallimat sikorsuarnik sapersissimapput piaarnerpaamillu ikiorneqartariaqarlutik, kaptajnløjtnant Jørgen G. Bruun, Kalaallit Nunaanni Sakkutooqarfimmi ingerlatsinermut immikkoortortaqarfimmi pisortaagallartoq oqaluttuarpoq.
Alapernaarsuut Ejnar Mikkelsen piffissap sivikitsuaqqap ingerlanerani Kangeq toraarlugu aallarpoq, umiatsiaaqqap tamaaniinnissaa naatsorsuutigineqarmat. Sakkutut alapernaarsuutaat Hvidbjørnen Arsuup kitaaniilluni aamma sumiiffiup tungaanut allarpoq. Hvidbjørnip qulimiguulia Lynx Kangeq angusinnaaleramiuk ingerlaannarluni aallartinneqarpoq.
Umiarsuit marluullutik tamarmik nalunaarutigaat sikorsuit eqimassusiat 9/10-iusoq, taamaattumillu umiatsiaaqqap ajornartorsiortup orninniarnerani malunnaatilimmik kinguarsarneqarlutik.
Sikorsuit aqqutigiuminaannerisa kingunerisaanik taamaallaat qulimiguulik Lynx annaassiniartussatut periarfissanngorpoq. Qulimiguullip inuttaasa misilittagaqaqisut ingerlaannaq umiatsiaaraq Kangerup kitaani nassaaraat, kiisalu nal. 22.45 qulimiguullip issimasut tamaasa annaatereerlugit Nanortalimmut ingerlappai.