Pujortartarunnaartunut 30.000 kr.-it
PAARISA ukiut arfinilissaannik unammisitsiniarpoq "Atuaqatigiit pujortartanngitsut". Unammisitsinermi pineqartut tassaapput meeqqat atuarfiini atuartut akulliit.
Maannakkut atuaqatigiit atuartut akullerneersut PAARISA-p atuaqatigiinnik pujartanngitsunut unammisitsineranut ilanngussinnaalerput. Unammisitsineq ukiut arfinilissaat ingerlanneqarpoq atuaqatigiit pujortartanngitsuuinnassanngillat, aammali allanik peqataatinniagaqassapput angajoqqaat aamma ilaquttat ikinngutillu paasisitsiniaanermikkut cigarettitorunnaartinniassavaat.
Atuaqatigiit amerlanerpaanik pujortartarunnaarsitsisut unamisitsinermi ajugaasuussapput. Ajugaasut akissarsiassaraat 30.000 koruunit.
Unammisitsinermi siunertaavoq meeqqat nalunngissusiisa toqqaasinnaanerisalu sanngisuunngortinniarnissaat peqqinnartumik kiisalu peqqinnissaq siunertaralugu ulluinnarni avatangiisitik aamma unamminartut naapittakkatik tunngavigalugit inuunissaminnik. Atuartut nammineq pilersitsiniarnerat aamma peqataaniarnerat qitiutinneqassaaq atuaqatigiit peqqinnissamik siuarsaanissamik suliaqassapput aamma siammarterillutik.
Atuaqatigiinnut unammisitsinermut peqataaniartunut pingasunik piumasaqaateqarpoq:
1. Atuaqatigiit tamarmik unammisitsinerup naammassinerani pujortarunnaarsimassapput.
2. Atuaqatigiit naammassillugit ingerlassimassaat pillugit nalunaarusiortoqassaaq.
3. Inuit atuaqatigiit pujortartarunnaartissimasaat allaganngorlugu uppernarsaassapput, assimik imaluunniit naatsumik videoliakkut pujortarunnaarnissaminnut ingerlavitsik uppernarsassavaat.
Unammisitsinermut peqataaniaraanni nalunaarfissaq kingulleq tassaavoq 1. juuni 2009.
Atuaqatigiit ilinniartitsisortik peqatigalugu ingerlatatik pillugit PAARISAmut nalunaarusiussapput. Nalunaarusiaq 30. novembari 2009 nallertinnagu nassiunneqassaaq. Naliliisussatut komitép PAARISAmit toqqarneqarsimasup 30. novembari 2009-p kingorna ajugaasut nalilersussavaat.
Unammisitsinermut atatillugu plakatit marluk sananeqarsimapput quppersagarlu peqitigaq allakkamik ilanngussiffigalugu meeqqat atuarfiinut tamanut nassiussorneqarpoq. Tamakku saniatigut KNR-TV-ikkut pilersisaarutit saqqummersinneqassapput.
Atortussat aaneqarsinnaasut uani www.paarisa.gl aaneqarsinnaapput.