DASH-7 Nuummut utertariaqarpoq
Air Greenlandip timmisartua DASH-7, GL544, Nuummiit Kangerlussualiartoq teknikkikkut ajornartorsiuteqalerluni utertariaqarsimavoq. 32-t Danmarkimut timmisartorsuaq inortorpaat.
Nuummiit aallatsiaannarlutik aquttuisa malugisimavaat timmisartup suluusaaniittut nikisittakkat (flaps-it) ikkuttoorlutik nikinneq ajulersimasut. Pisoq ajornartorsiornermik nassataqanngilaq, timmisartorlu nal.ak. affaata missaani orsussamik atuiniarluni qulaavaaqqaarpoq, Nuummi mittarfimmut isumannaatsumik missinnaanissaq anguniarlugu.
Kangerlussualiarani Nuummut utiinnarnermut peqqutaavoq flaps-it Nuummiinnaq suliarineqarsinnaammata, paasissutissiisartoq Pia C. Bang ilisimatitsivoq.
Ilaasut timmisartornerup ingerlanerani ilisimatinneqarput, maleruagassallu nalinginnaasut naapertorlugit Nuummi minnerup kingorna katersortinneqarput naatsumillu ilisimatitsissuteqarfigineqarlutik.
Tassunga timmisartumut ilaasut 32-it utiinnarnerup nassataanik Danmarkiliartumut angumersinngillat, aqaguli pingasunngornermi Narsarsuakkoorlutik timmisartuunneqassapput.
Taakku saniatigut Sisimiunut Ilulissanullu ingerlasussat kingusinaaraluarlutik ullup ingerlanerani apuutissapput.
Utertariaqalernerup nassataanik timmisartuussinissat allat marluk Kangerlussuarmiit kinguaattuussapput. Taamaasilluni GL551 Nuummukartussaq nal. 11.45 aallassaaq GL582-ilu Ilulissiartoq nal. 14.30 aallassaaq.