Pisortap illua pisiarineqarnerminiit arfineq marloriaammik akeqartillugu tuniniarneqartoq
Attartortumiit piginnittumut illu Nuummiittoq pisiarineqarpoq millionit affaasa missaannik ailerlugu maanna tuniniarneqarpoq 3,7 millioner koruunilerlugu.
»Aqqusinermi ingerlaqqinngitsumi illoqarfimmut qanittumi illu marlunnik quleriilik nuannersoq takuneqarsinnaavoq. Nuummi illoqarfiup immikkoortuani pilerigineqarnerpaasumiippoq illu minutsialunnguani illoqarfiup qeqqa anguneqarsinnaalluni,« taamatut allassimavoq illoqarfimmi illunik tuniniaasartut ilaata pilerisaarutaanni.
Siornatigut pisortap illorisimasaa 147 kvadrameteriuvoq attartortumillu 2004-mi pisiarineqarpoq namminersornerusut illuutiminik akikillerujussuarlugit attartortunut tuniniaasalermat.
Illu niuernermut nalinginnaasumut akigitinneqartut tunngavigalugit nalilerneqarpoq 900.000 koruuninik teknikkikkut-aningaasatigullu nalilerneqarluni 498.000 koruuninik. Maanna nalinginnaasumik illunik tuniniaasarnermi tuniniarneqarpoq 3,7 millioner koruunilerlugu - pisiarineqarneraniit arfineq marloriaammik akilerlugu.
Ilaqutariit illumik pisisut namminersornerusut akit nikerarnerannut qularnaveeqqusiissutaat 50 procentimik appartippaat imaluunniit ukiumut ti procentimik.
Akit nikerarnerannut qularnaveeqqusiissut iluanaapilunneq pinaveersaartinniarlugu atuutilersinneqartoq appartinneqarpoq 183.500 koruuninik. Tassalu taakkuupput landskarsip tunisinermut atatillugu aningaasat pissarsiassai, tuninerani tre millioner koruuninik qaffasinnerutigisoq attartortumiit piginnittumut pisiarineraniit.