Meeqqat kaattut Danmarkip Kalaallit Nunaatalu isumaqatiginninniutigissavaat
FN-ip meeqqat piginnaatitaaffiinik isumaqatigiissutaata Kalaallit Nunaanni eqqortinneqarnissaata qulakkeerneqarnissaa Kalaallit Nunaata Danmarkillu akisussaaffigaat. Taamak atugarissaarnermut ministeri Karen Jespernsen Venstre-neersoq Folketingip Kalaallit Nunaannut tunngasunut ataatsimiitsitaliaanut akissummini erseqqissaavoq.
Ilaatigut meeqqat akornanni kaattoqartarnera pissutigalugu Kalaallit Nunaata meeqqat piginnaatittaaffiinik isumaqatigiissutaanik eqqortitsinnginneranik FN-ip meeqqanik sullissiviata UNESCO-p uparuaanerata kingorna ataatsimiitsitaliami oqallinnerup kingorna akissut takkuppoq.
Ministerip akissummini erseqqissarpaa danskit naalakkersuisuisa nunanut allanut tunngatillugu - naalagaaffeqatigiit sinnerlugit - kalaallit Nunaata meeqqat piginnaatitaaffiinik isumaqatigiissutip eqqortissagaa akisussaaffigigaat. Tassa Danmark ukiut tallimakkaartumik FN-imit misissuiffigineqartarpoq piginnaatitaaffinnik eqqortitsinersoq qulakkeerniarlugu.
Taamaattoq Danmarkip Kalaallit Nunaatalu akornanni namminersornerullutik oqartussat akisussaasuupput - aamma sulianik taamatut agguaassineq allanngortinneqassanngilaq, aamma Kalaallit Nunaat juunip 21-iani namminersuleraluarpalluunniit.
- Nammminersornerullutik oqartussat akisussaaffimmik tigusaminni nunat tamat iosumaqatigiissutaannut pisussaaffimminik eqqortitsinersoq apeqqummut tunngatillugu ministerip pineqartumut attuumassuteqartuusup suliamullu naalakkersuisuusup akornanni politikkikkut oqaloqatigiittariaqalernissat pisariaqalersinnaavoq, Karen Jespersen akissummini allappoq.
Ministerip aamma ilannguppaa Kalaallit Nunaata pineqartumut eqqortitsiniarluni qanoq iliuuseqassanersoq piginnaatitaaffinnik isumaqatigiissummi isummernertaqanngimmat - taamaalilluni Kalaallit Nunaat FN-ip malittarisassaanik eqqortitsiniarnermi nunanut allanut suliniaqatigiinnulluunniit ikioqqulluni saaffiginninnissamut pissussaaffiligaanngilaq.