Aleqa Hammondip Enoksen unammilleqqippaa
Naalakkersuisunut ilaasortaasimasup Aleqa Hammondip Siumup siulittaasua Hans Enoksen unammilleqqippaa, tamatumuuna qinersinerup kingorna kina naalakkersuisuni siulittaasunngussanersoq unammilliutigalugu.
Taamatut paasissutissiivoq KNR.
Aleqa Hammondip aningaasaqarnermut nunanullu allanut naalakkersuisuusimasup tikkuarpaa Inatsisartunut qinersinerup kingorna kina naalakkersuisuni siulittaasuunissaanik apeqqummi qinersisartunit illersorneqarluni.
Taamaasilluni qinersinissamik nalunaarutiginninnerup kingorna Sermitsiaq sinnerlugu HS Analysep qinersisartunik isumasiuinerata takutippaa Siumumik taasisartut 60 procentiisa Hans Enoksen naalakkersuisuni siulittaasuutikkusuppaat, 37 procentillu allamik siulittaasoqarusuttut - tamatumanilu Aleqa Hammond nukittuumik inissisimalluni.
Aleqa Hammondip 2008-mi kina partiimi siulittaasuunissaanik ilaasortanik tamanik taasisitsinermut atatillugu Hans Enoksen unammillerpaa.
Enoksenimik ulorianartorsiortitsisinnaasutuaq tassaasimavoq naalakkersuisunut ilaasortaq Aleqa Hammond.
Taasisitsinermi Hans Enoksen 821-nik taaneqarpoq, Aleqa Hammondilu 648-nik taaneqarluni. Taasisitsinermi illoqarfinni arlalinni ajugaavoq: Nuummi, Maniitsumi, Qeqertarsuarmi, Uummannami Qaanaamilu.