Ilaqutariinni incest pillugu Isiginnaartitsissut qullilisitsivoq
Isiginnaartitsissut "Oqarit! Inuullutillu!", "Sig det! Og lev!" Katuami inunnik ulikkaartumi isiginnaartitsissutigineqarpoq.
Meeqqanit inussuttunillu kinguaassiutitigut atornerluisarneq pillugu isiginnaartitsissut Nuummi kulturikkut illorsuarmi Katuami aqqissuussinermi aaqqissuussat arlallit ilagaat.
Isiginnaartitsissut Pipaluk Kreutzmannimit ilitsersuiffigineqartoq aliikkutaralugu isiginnaartitsisartunit Arnatsiaq R Eeriksenimit, Nina K. Jørgensenimit, Vilhelm Egedemit aamma Mike Fencker Thomsenimit isiginnaartitsinerminni uppernarluinnartumik isiginnaaritsisunit inuttaaffigineqarpoq.
Isiginnaartitsisut misigissutsinik piviusorpalaartitsinermillu ima takutitsilluartigaat isiginnaartitsissut naamma qullilisimasut amerlallutik.
"Oqarit! Inuullutillu", "Sig det! Og lev!"-mi malittarineqarput Arnaq aamma Kaali, marluullutik ilaquttaminnit kinguaassiutitigut atornerlugaasimasut taamatullu atornerlugaasimanerminnik kikkunnulluunniit oqaluttuarsinnaanngitsut.
Taakkua kanngusunnerat, imminut pissutinnerat annilaanganerallu tupinnaannartumik piviusorsiorpaluttumik sakkortuumillu nipilersuutit, filmit isiginnaartitsinerillu atorlugit takutinneqarput. Taamalu aamma naggataa ilungersuummernartoq isiginnaartut tamarmik attortiffigaat.
Oqariartuutigineqarpoq oqaloqatigiinnissaq. Ammarluni atornerlunneqarsimanerit oqaluttuarinngikkaanni naggataatigut inuuneq toquluunniit qinigassanngorsinnaapput.
Aaqqissuussinermi aamma pineqartumut immikkut suliaqartut oqallinnissamut tunngavissanik oqalugiarneranik imaqarpoq, soorlu psykolog Karen Marie Nathansen, taassuma meeqqat kinguaassiutitigut atornerlunneqarsimagunik ukioqqortussutsini assigiinngitsuni qanoq qisuariarsinnaasarneri oqaluttuarai. Saniatigut aamma ilinniartitsisuugaanni, angajoqqaajugaanni imaluunnit ilisarisimannittuugaanni ersiutaasartut qanoq maluginiarneqarnissaanerinut paasissutissat iluaqutissat saqqummiunneqarput.