Siunnersuisartut inuusuttut ilinniagaqarusulersissavaat
Peqatigiiffik Grønlandske Børn atuartut ilinniarnissaminnut takorluukkaminnik piviusunngortitsinissaannut suinnersuisartussanik ilinniartitsiniarpoq
Inuusuttut ilinniagaqarusussuseqalersinneqartariaqarput, taamatut isumaqarpoq peqatigiiffik Foreningen Grønlandske Børn maanna siunnersuisartussanik mentor-inik ilinniartitsinialersoq, taakku Nuummi Atuarfik Samuel Kleinschmidtimi, ASK-imi, atuartunut maligassiuisartuusassapput.
Maannakkut siunnersuisartut arfineq pingasut misiligutaasumik suliniummut ilanngutereerput, peqatigiiffilli neriuppoq atuartunut siunnersuisarnermik misileerusuttunik inuusuttunik arfineq pingasunik allanik peqataasoqalissasoq.
– Misiligummik suliniut ukiuni marlunni ingerlassaaq, misilittakkallu pitsaassappata taava Kalaallit Nunaanni allani aamma taamatut suliniuteqarnissaq ingerlaterusupparput, suliniummik aqutsisoq Sissel Lea Nielsen nassuiaavoq.
Siunnersuisartut siulliit 2008-mi aasakkut ilinniartinneqarput, tamatumalu kingornatigut sapaatit akunnikkaartumik ASK-imi unnukkut inuusuttut ataatsimiittarlutik.
– Siunnersuisarnermik suliniut tamanna ilinniartitsisut inissisimanerannut allatut periarfissaavoq. Ilinniartitsisut ilinniakkamut tunngatillugu saqqummiussisarnissaq suliassaraat, siunnersuisartullu atuartunut suliniummi peqataasunut maligassiuisartuussapput. Siunnersuisartut atuartunik isummersuisassapput takorluukkamillu angunissaannut perusussuseqalersitsisassallutik, Sissel Lea Nielsen oqarpoq.
Sammisaq pillugu Sermitsiaq normu 12 atuaruk.