GTE nunaqarfinnut
Ukiuni kingullerni nunatsinnut umiarsuarlutik takornariartut amerleriarnerat illoqarfiit kisimik iluaqutigissanngilaat. Taamaattumik Destination Avannaa GTE/NTIS-ilu nunaqarfinni aallarnisaapput.
Ukiuni kingullerni nunatsinnut umiarsuarlutik takornariartut amerleriarnerat annertooq illoqarfiit kisimik iluatsitsivigissanngilaat. Taamaammat Konrad Seblon Destination Avannaaneersoq (DA) aamma Maja Biilmann Nunatsinnit Takornariaqarnermut Inuussutissarsiornermullu Siunnersuisoqatigiit-neersoq (NTIS) suleqatigiillutik umiarsuit takornariutit nunaqarfinnut tulattarnerisa kinguneqarluarnerusarnissaat aallarnisaaffigaat.
Siunnersortit sapaatip akunnerani kingullermi uanilu Qaasuitsup Kommuniani nunaqarfiit Niaqornat, Qaarsut aamma Ukkusissat tikeraarsimavaat, taakkunanilu umiarsuarlutik takornariartunit soqutigisallit aggersarsimallugit, umiarsuarlutik takornarissanit sullissinermut tunngatillugu kisitsisit, arlaannut illuaqqajaanerit periarfissallu sammineqarlutik. Katerisimaarnernut siunertaavoq nunaqarfinni nutaanit nukissaqartoqalissasoq qanoq ilioraanni tulatsitsineq iluatsinnerpaassasoq aamma qanoq isertitat qaffassarneqarsinnaanersut.
- Oqariartuutaavoq suliniuteqaraanni aporfiit annertunngikkaluit unitsitsisassanngitsut, taamaattoqartillugulu avaarani siuariartorniarneq aallunneqartuartariaqartoq. Tamaannga killittoqartillugu DA aamma NTIS siunnersuinermik periarfissaqarpoq, taama Konrad Seblon oqaaseqarpoq.
Siunnersortit taakku marluk oqaatigaat Niaqornani Ukkusissanilu umiarsuarlutik takornarissat sullilluarneqarnissaat anguniarlugu suliniuteqaqatigiittoqartoq. Ullunilu makkunani Qaarsuni suliniuteqaqatigiit taamaattut pilersinneqalerlutik. Taakkununnga ataatsimoorutaavoq piginnaasallit assigiinngitsut peqataammata, ilinniartitsisuniit, aalisartunut, nunaqarfimmi politi-it sinniisaannut, juumuunut allallumi peqataallutik.
Uummannamittaaq aamma ataatsimiittoqarpoq, tamannalu kinguneqarluni umiarsuarlutik takornariartut sullilluarneqarnissaat anguniarlugu suliniuteqaqatigiit pilersinneqarnerannit.
- DA aamma NTIS aallarnisaareerput, qilanaaraarpullu ineriartortitsinerit qanimut malittarinissaat, pisariaqartitsisoqartillugulu atassuteqarfigineqarnissarput piareersimaffigalutigu, taama Konrad Seblon aamma Maja Biilmann oqarput.