Taxanik atuineq inuit mamiatsaatigaat
Namminersornerusut ukiut tallimat ingerlaneranni taxanut 6,7 millioner kroninik atuisimanerat sermitsiaq.gl-ip oqallittarfiani allattartut mamiasuutigaat.
Namminersornerusut taxanik atuisarnerat 2004-miit 2008 naanissaata tungaanut arriitsumik annertusiartuaarsimavoq. 2008-mi taxanut katillugit 1,5 millioner kronit atorneqarsimapput.
– Illassaagut imaluunniit qiassaagut? Ataaserli ilumoortoq aajuna qallunaat folketingianni ilaasortat taamarsuaq taxarnermut aningaasartuuteqarsimagaluarpata qassiiliutaarujussuartussaagaluarmat, taama oqalliseqataasoq Edvardt allappoq.
Oqalliseqataasoq Arnaq Akulleq taxanut atuinermut tupigusuppoq.
– Suut tamarmik imminnut qanitsigitillugit pisortat akiligaannik kimut, suna pillugu aamma suna peqqutigalugu taamarsuaq ulapputaasimava, Arnaq Akulleq allappoq.
Allat aningaasat sumut atorneqarsinnaagaluarnerannut tigussaasunik siunnersuuteqarput.
– Kalaalllit Nunaanni Namminersornerusut 6,7 millioner kronenut Københavnimi inissianik blokinik pisisinnaagaluarput, taakku politikerit akunnikkallartarfiisut napparsimasut sivisuumik nakorsartittut ilaqutaannut aamma/imaluunniit ilinniartut katerisimaartarfissaattut atorneqarsinnaagaluarput, oqalliseqataasoq Pedersen sermitsiaq.gl-imi taamak allappoq.
Oqalliseqataasut ilaat alla namminersornerusuni taxanik atuinermut annikillisaataasinnaasumik siunnersuuteqarpopq.
– Tamarmik qattuninnguakkut itigiinnartuussaapput, Nuup Bussiinut ukiumoortumik naqittagartaaginnarsinnaapput! "tikittunut akimasuunut" takoqqusaarutaaginnaratik CO2-imik aniatitsinermut apparsaaqataastutut avatangiinerisanut oqariartuutaasinnaapput (inuinnaat biiliinik ikilisitsinikkut) aamma "pigissaarutinit ajornartorsiutit", soorlu biilip atornissaraluanut taarsiullugu bussinut angumiarsiniassagaanni pisarnermit halv tiimimik sioqqutsilluni makissinnaaneq, taamalu inuiaqatigiit sullillugit, oqalliseqataasoq Ordet allappoq.