Aningaasat pappialat ukiut marluk qaangiuppata piariissapput
Ukioq manna namminersorneq eqqunneqarpat pappialanik aningaasanik kalaalerpaluttunik titartagartalinnik peqassanngilaq. Aatsaat 2011-mi kalaallit aningaasaataat pappialat atorneqalissapput.
Aningaasat pappialat 50 koruuniniit 1000 koruunit kalaallit inuiattut ilisarnaatitallit naatsorsuutigineqarpoq ukiup 2011-p ingerlanerani tamanut saqqummersinneqarnissaat, taama allaaserisaqarpoq AG. Ukioq manna Kalaallit Nunaat namminersulerpat aningaasat atugassanngortinneqartussaasimagaluarput.
Suliarli kinguaattoorpoq eqqumiitsuliortup Naja Abelsenip aamma Nationalbankenip suleqatigiinnerat ajornartorsiutinngormat. Taarsiullugu eqqumiitsuliortoqataa Miki Jakobsen taakkunannga suliaqartinneqartussanngorpoq.
– Suliaq pissanganaqaaq, kisianni sivisussaaq. Aamma titartaqqissaarnera, tamanna Nationalmuseumip grafikerii teknikkeqarnermullu sulisui suleqatigalugit pissaaq, Miki Jakobsen AG-mut oqarpoq.
Aningaasat ilisarnaataat allanngortinneqarsinnaanngitsoq tassaassaaq nanoq. Taassuma saniatigut aningaasat Kalaalit Nunaata oqaluttuatoqaanit pisunik titartagartaqassaaq kiisalu uumasunik kalaallinut iluaqutaasunik titartagartaqassalluni.